យោងតាមការចុះផ្សាយរបស់ ក្រសួងព័ត៌មាន នៅថ្ងៃទី២០​ ខែមីនា ឆ្នាំ២០២៣ បានឱ្យដឹងថា កីឡាការិនីជម្រើសជាតិកម្ពុជាលើប្រភេទកីឡាប៊ីយ៉ាការ៉ុម ស្រួង ភាវី បានបង្ហាញពីការត្រៀម​ខ្លួន​យ៉ាងល្អ ក្នុងការចូលរួមប្រកួតប្រជែងមេដាយជូនជាតិ ក្នុងព្រឹត្តិការណ៍កីឡាស៊ីហ្គេម លើក​ទី៣២ នាខែឧសភា ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។

ក្នុងនាមជាកូនខ្មែរមួយរូប និងក្នុងនាមជាកីឡាការិនីមួយរូប ​ស្រួង ភាវី ពិតជា​មានក្តី​រំភើប​រីករាយ និងមោទកភាពជាតិ ដើម្បីត្រៀមចូលរួមប្រកួតប្រជែងមេដាយ និងកិត្តិយស​ជូនជាតិ ក៏ដូចជារួមចំណែកលើកស្ទួយវិស័យកីឡាកម្ពុជា ក្នុងនាមជាម្ចាស់ផ្ទះ ស៊ីហ្គេម លើក​ទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា ក្រោយរង់ចាំអស់រយៈពេល ៦៤ឆ្នាំ។

ឆ្លើយឆ្លងតាមប្រព័ន្ធសារអេឡិចត្រូនិកពីសាធារណរដ្ឋកូរ៉េ នៅថ្ងៃទី១៨ ខែមីនា ឆ្នាំ២០២៣ ដែលបានថ្លែងប្រាប់ទីភ្នាក់សារព័ត៌មានកម្ពុជា AKP កីឡាការិនីដ៏ឆ្នើម ស្រួង ភាវី បានលើកឡើងយ៉ាងដូច្នេះថា៖ «សម្រាប់នាងខ្ញុំផ្ទាល់ ក៏អាចចាត់ទុកថាជាប្រវត្តិសាស្ត្រថ្មីមួយ ក្នុងនាមជាកីឡាការិនីប៊ីយ៉ាការ៉ុម ដើម្បីត្រៀមបង្កើតថ្វីដៃ។ ការបង្ហាញវត្តមានប្រភេទកីឡាប៊ី​យ៉ាការ៉ុម ក្នុងព្រឹត្តិការណ៍ស៊ីហ្គេម ឆ្នាំ២០២៣នេះក៏ចង់ចូលរួមបំផុសស្មារតីដល់ប្រជា​ជន​ខ្មែរ ឱ្យចូលរួមគាំទ្រដល់កីឡាកម្ពុជាឱ្យកាន់តែរីកចម្រើនបន្ថែមទៀត»។ បន្ថែមពីលើនេះ កីឡា​ការិនី ដែលមានស្រុកកំណើតនៅខេត្តត្បូងឃ្មុំរូបនេះគូសបញ្ជាក់បន្ថែមថា កាលពីពេលកន្លងទៅ គ្រាន់តែទទួលបានដំណឹងថា នាងខ្ញុំបានចូលរួមប្រកួតកីឡាស៊ីហ្គេម នៅកម្ពុជា គឺថាបេះដូង​នាងខ្ញុំមានក្តីរំភើបឥតឧបមា ហើយដំណឹងនេះបានផ្តល់ថាមពលកម្លាំងដ៏ធំមួយសម្រាប់​នាង​ខ្ញុំ និងបានប្រាប់ខ្លួនឯងថា ពិតជាអស្ចារ្យខ្លាំងណាស់ ស្របពេលដែលប្រជាជនខ្មែរទាំងអស់​បានផ្តល់ការគាំទ្រយ៉ាងពេញទំហឹង ក្នុងនាមជាប្រជាជនម្ចាស់ផ្ទះ ស៊ីហ្គេម និងអាស៊ាន​ប៉ារ៉ាហ្គេម ឆ្នាំ២០២៣ ទាំងអស់គ្នា»។

ជាមួយគ្នានេះ កីឡាការិនី ស្រួង ភាវី ដែលកំពុងរស់នៅ និងប្រកបអាជីពប៊ីយ៉ាការ៉ុម​នៅ​សាធារណរដ្ឋកូរ៉េរូបនេះក៏បានសំណូមពរដល់ប្រជាជនខ្មែរទាំងអស់ចូលរួមគាំទ្រ ផ្តល់​កម្លាំង​ចិត្ត​លើក​ស្ទួយ​កីឡាកម្ពុជាឱ្យអស់ពីចិត្ត សម្រាប់ការប្រកួតកីឡាស៊ីហ្គេម-អាស៊ាន​ប៉ារ៉ា​ហ្គេម ឆ្នាំ២០២៣ ពីព្រោះនេះជាព្រឹត្តិការណ៍កីឡាដ៏ធំរបស់ប្រជាជនកម្ពុជាទាំងមូល ក្នុងនាម​ជា​ម្ចាស់ផ្ទះទាំងអស់គ្នា។ ការគាំទ្រ ផ្តល់កម្លាំងចិត្តពីប្រជាជន មហាជនទាំងអស់ពិតជាមាន​សារៈសំខាន់ខ្លាំងណាស់។

កីឡាការិនី ស្រួង ភាវី បានប្តេជ្ញាចិត្តថានឹងបន្តខិតខំហ្វឹកហាត់ឱ្យ​បានខ្លាំងក្លាបន្ថែម​ទៀត ដើម្បីត្រៀមចូលរួមប្រកួតប្រជែងមេដាយជូនជាតិ ក្នុងនាមកម្ពុជាជាម្ចាស់ផ្ទះព្រឹត្តិការណ៍​ដ៏​អស្ចារ្យ​នេះ​។ «នាងខ្ញុំប្តេជ្ញាចិត្តថា នឹងប្រឹងប្រែងហ្វឹកហាត់ឱ្យបានខ្លាំងក្លាបន្ថែមទៀត ក្នុងការ​ដាក់ចិត្តដាក់កាយត្រៀមខ្លួនឱ្យល្អ រឹងមាំល្អ ជាងការប្រកួតនៅកូរ៉េ និងការប្រកួតអន្តរជាតិ​នានាទៅទៀត ពីព្រោះស៊ីហ្គេម ២០២៣ គឺជាកិត្តិសធំធេងរបស់ជាតិ។ ដូច្នេះ​ក្នុងនាមខ្ញុំជាកូន​ស្រី​កម្ពុជា និង​ជា​តំណាង​ឱ្យ​ប្រជាជាតិ​ខ្មែរ​នឹងចូលរួមប្រកួត​ ហើយ​និង​​ខិតខំ​ឱ្យ​អស់​ពី​កម្លាំង​កាយ​​ចិត្ត ដោយ​​ធ្វើ​យ៉ាង​ណា​ប្រកួតដណ្តើម​ជ័យជម្នះ​ជូន​ជាតិ​មាតុភូមិ ​និងប្រជាជន​ខ្មែរទាំង​អស់គ្នា»។នេះជាការអះអាងបន្ថែមរបស់កីឡាការិនី ស្រួង ភាវី។

ជុំវិញការត្រៀមខ្លួនរបស់កម្ពុជា លើប្រភេទកីឡាប៊ីយ៉ា-ស្នូកឃ័រ សម្រាប់ស៊ីហ្គេម ឆ្នាំ២០២៣ លោក ម៉ារ៉ា សុជាតិ អគ្គលេខាធិការសហព័ន្ធកីឡាប៊ីយ៉ា និងស្នូកឃ័រកម្ពុជាបាន​ថ្លែង​ថា សហព័ន្ធបានត្រៀម១០វិញ្ញាសាសម្រាប់ស៊ីហ្គេម ២០២៣ ដោយក្នុងនោះ មានផ្នែក​បុរស ៦វិញ្ញាសា និងនារី ៤វិញ្ញាសា។ លោកអគ្គលេខាធិការរូបនេះ បានអះអាងថា៖ «សម្រាប់​កីឡាការិនី ស្រួង ភាវី នឹងចូលរួមប្រកួតលើ២វិញ្ញាសា គឺវិញ្ញាសាប៊ីយ៉ាការ៉ុម ១បាំង (1 Cushion) និង៣បាំង (3 Cushion)»។

លោក ម៉ារ៉ា សុជាតិ បានបង្ហាញក្តីសង្ឃឹមយ៉ាងខ្ពស់របស់បេក្ខភាពប្រកួតប្រជែង​របស់​កីឡាការិនី ស្រួង ភាវី ដោយលើកឡើងយ៉ាងដូច្នេះថា៖«ជាគោលដៅ យើងសង្ឃឹមខ្ពស់​លើ​កីឡាការិនី ស្រួង ភាវី ដែលនឹងអាចឈ្នះមេដាយមាស តែម្តង ពោលគឺ សង្ឃឹម ១០០ភាគរយ តែម្តង។ នេះបើយោងទៅលើសមត្ថភាពបច្ចេកទេសរបស់គាត់ ដែលឆ្លងកាត់ការហ្វឹកហាត់ ការប្រកួត បទពិសោធន៍អន្តរជាតិជាច្រើន កន្លងមក»។

លោកស្រី ស្រួង ភាវី ធ្លាប់ដណ្តើមបានពានរង្វាន់អន្តរជាតិជាច្រើនជាបន្តបន្ទាប់ ប៉ុន្តែ​លោក​ស្រី​តែងតែប្រកួតតំណាងឱ្យប្រជាជាតិខ្មែរ ដោយរាល់ដងលោកស្រីតែងតែបង្ហាញ​ទង់​ជាតិកម្ពុជា ក្នុងពេលប្រកួត និងពេលទទួលបានពានរង្វាន់ម្តង២។

«ខ្ញុំពិតជាសប្បាយចិត្ត ដែលនាងខ្ញុំមានឱកាសត្រៀមចូលរួមប្រកួតដណ្តើមមេដាយ ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដោយសហព័ន្ធកីឡាប៊ីយ៉ា និងស្នូកឃ័រកម្ពុជា បានដាក់បញ្ជូលនូវវិញ្ញាសាប៊ីយ៉ាការ៉ុម ដែលខ្ញុំចេះស្រាប់។ នេះជាកម្លាំងចិត្ត រំភើប និងសប្បាយចិត្តគ្មានអ្វីប្រៀបផ្ទឹមពុំបាន»។ លោកស្រី ស្រួង ភាវី បានបញ្ជាក់បន្ថែម។

ជាមួយនឹងកិច្ចការចូលរួមជួយដល់ការងារសង្គមជិត១០ឆ្នាំមកនេះ ត្រូវបានលោកស្រី ស្រួង ភាវី បានអះអាងថា កន្លងទៅលោកស្រីបានមកលេងស្រុកកំណើត ក្នុង១ឆ្នាំៗ ២ដង ហើយចំណាយថវិកាផ្ទាល់ខ្លួនចន្លោះពី ២ម៉ឺន ទៅ៣ម៉ឺនដុល្លារអាម៉េរិក បូករួមទាំងថវិកាដែល​ប្រមែប្រមូលបានពីសប្បុរសជនផ្សេងៗទៀត។ នៅក្នុងឆ្នាំ២០២១កន្លងមកនេះ លោកស្រីមិន​បានមកកម្ពុជា ប៉ុន្តែលោកស្រីតែងតែផ្ញើថវិកាផ្ទាល់ខ្លួន ពី ៤ ០០០ ដុល្លារ ទៅ ៥ ០០០ ដុល្លារអាម៉េរិក មកជួយដល់ការងារសប្បុរសធម៌ តាមរយៈគម្រោងមូលនិធិនៅកម្ពុជា៕

ប្រភព៖ ក្រសួងព័ត៌មាន