សភាប្រទេសអ៊ូហ្គង់ដាបានអនុម័តច្បាប់មួយ ដែលអាចដាក់ពន្ធនាគាររយៈពេលវែង ឬមួយជីវិត ចំពោះអ្នកស្រឡាញ់ភេទដូចគ្នា
- BY
- autoadmin
- March 22, 2023
សភាប្រទេសអ៊ូហ្គង់ដាបានអនុម័តច្បាប់មួយ ដែលនឹងដាក់ទោសក្រុមមនុស្សស្រឡាញ់ភេទដូចគ្នាឱ្យជាប់ពន្ធនាគាររយៈពេលវែង ប្រសិនបើច្បាប់នេះត្រូវបានចុះហត្ថលេខាដោយប្រធានាធិបតី Yoweri Museveni។ នៅក្រោមច្បាប់ដែលបានស្នើឡើង មិត្តភ័ក្តិ ក្រុមគ្រួសារ និងសមាជិកនៃសហគមន៍អ្នកស្រឡាញ់ភេទដូចគ្នា នឹងត្រូវមានកាតព្វកិច្ចរាយការណ៍បុគ្គលដែលមានទំនាក់ទំនងផ្លូវភេទដូចគ្នាទៅកាន់អាជ្ញាធរ។ អំពើស្រឡាញ់ភេទដូចគ្នាគឺជាអំពើខុសច្បាប់រួចទៅហើយនៅក្នុងប្រទេសនេះ ប៉ុន្តែច្បាប់នេះចង់បន្ត និងដាក់ទោសមនុស្សដោយផ្អែកលើអត្តសញ្ញាណផ្លូវភេទរបស់ពួកគេ។
សេចក្តីព្រាងច្បាប់នេះ ដែលត្រូវបានតាក់តែងជាលើកដំបូងនៅដើមខែនេះ បានអនុម័តដោយមានការគាំទ្រយ៉ាងទូលំទូលាយនៅក្នុងសភារបស់ប្រទេសអ៊ូហ្គង់ដាកាលពីថ្ងៃអង្គារ។ ឥឡូវនេះ វានឹងទៅដល់តុរបស់លោកប្រធានាធិបតី Museveni ថាគួរចុះហត្ថលេខាលើច្បាប់ ឬអត់ ព្រោះវាអាចប៉ះពាល់ទំនាក់ទំនងជាមួយម្ចាស់ជំនួយ និងវិនិយោគិនលោកខាងលិច។
សេចក្តីព្រាងច្បាប់នេះ ក៏ចែងថា បុគ្គលដែលត្រូវបានកាត់ទោសពីបទ បង្ខំ ឬជួញដូរកុមារ ក្នុងគោលបំណងចូលរួមសកម្មភាពស្រឡាញ់ភេទដូចគ្នា ប្រឈមមុខនឹងការជាប់ពន្ធនាគារអស់មួយជីវិត។ បុគ្គល ឬស្ថាប័នដែលគាំទ្រ ឬផ្តល់មូលនិធិដល់សកម្មភាព ឬអង្គការសិទ្ធិអ្នកស្រឡាញ់ភេទដូចគ្នា ឬបោះពុម្ពផ្សាយ និងចែកចាយសម្ភារៈ និងអក្សរសិល្ប៍ ដែលគាំទ្រអ្នកស្រឡាញ់ភេទដូចគ្នា ក៏ប្រឈមមុខនឹងការកាត់ទោស និងដាក់ពន្ធនាគារផងដែរ៕
អត្ថបទ៖ លីដា
ប្រភព៖ BBC
- Share This Post: