និស្សិតចិនម្នាក់ជាប់ពន្ធនាគាររយៈពេល ១ឆ្នាំ ដោយសារលួចថតរូបមូលដ្ឋានការពារជាតិរបស់អាមេរិក

និស្សិតចិនម្នាក់ឈ្មោះ Zhao Qianli អាយុ ២០ឆ្នាំ មកពីសាកលវិទ្យាល័យភាគខាងជើងនៃប្រទេសចិន ត្រូវបានចាប់ខ្លួនកាលពីចុងឆ្នាំមុន ដោយសារគាត់បានថតរូបមូលដ្ឋានកងទ័ពជើងទឹកអាមេរិក។ លោក Zhao កាលពីថ្ងៃអង្គារបានសារភាពថាមានពិរុទ្ធ ដោយលោកបានថតរូបមូលដ្ឋានការពារជាតិរបស់អាមេរិកពិតមែន និងត្រូវបានតុលាការអាមេរិកដាក់ទោសឱ្យជាប់ពន្ធនាគាររយៈពេល ១ឆ្នាំ។

យ៉ាងណាមិញដំបូងឡើយមេធាវីរបស់លោក Zhao បានប្រកែក និងអះអាងថា លោក Zhao គ្រាន់តែជាអ្នកទេសចរម្នាក់ដែលបានវង្វេងផ្លូវ និងដើរវង្វេងដល់ទីនោះតែប៉ុណ្ណោះ។ ប៉ុន្តែអ្នកស៊ើបអង្កេតបាននិយាយថា លោក Zhao មានរូបថតមូលដ្ឋានកងទ័ពនៅលើទូរស័ព្ទដៃ និងកាមេរ៉ារបស់គាត់ ហើយគ្មានទីតាំងទេសចរណ៍ណាមាននៅម្តុំ Key West នេះទេ៕

អត្ថបទ៖ លីដា
ប្រភព៖ nextshark