ក្រសួងសុខាភិបាល ហាមឃាត់គណនីហ្វេសប៊ុកមួយ ដែលកំពុងផ្សព្វផ្សាយលក់ផលិតផលទឹកដោះគោម្សៅ«Nutri Diabet Gold» គ្មានការទទួលស្គាល់ពីក្រសួង

រាជធានីភ្នំពេញ៖ យោងតាមការចុះផ្សាយរបស់ ក្រសួងសុខាភិបាល បានចេញសេចក្តីជូនព័ត៌មាន ស្តីពីការហាមឃាត់គណនីបណ្តាញសង្គមហ្វេសប៊ុកចំនួន ០១ កំពុងផ្សព្វផ្សាយលក់ផលិតផលទឹកដោះគោម្សៅ Nutri Diabet Gold ដោយគ្មានការទទួលស្គាល់ ពីក្រសួងសុខាភិបាល។

យោងតាម ការពិនិត្យឃើញលើបណ្ដាញសង្គមហ្វេសប៊ុកមានគណនីឈ្មោះ៖ NutriDiabet Gold កំពុងផ្សព្វផ្សាយលក់ផលិតផលទឹក ដោះគោម្សៅឈ្មោះ Nutri Diabet Gold ដោយគ្មានក្រុមហ៊ុនច្បាស់លាស់ ព្រមទាំងគ្មានច្បាប់អនុញ្ញាតឱ្យផ្សព្វផ្សាយពី ក្រសួងសុខាភិបាល ។

ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ទៀតនោះ ក្រសួងសុខាភិបាលសូម ជូនព័ត៌មានដល់សាធារណជនទាំងអស់ ត្រូវបញ្ឈប់ការប្រើប្រាស់ ឬទិញផលិតផលទឹកដោះគោម្សៅដែលកំពុងផ្សព្វផ្សាយគ្មាន លក្ខណៈវិទ្យាសាស្ត្រតាមគណនីហ្វេសប៊ុកឈ្មោះខាងលើ និងគ្មានការអនុញ្ញាតពីក្រសួងសុខាភិបាល។

ក្រសួងសុខាភិបាល នឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកខាងលើនេះ ដែលបាន ផ្សព្វផ្សាយផលិតផលនេះ។ ក្នុងករណីបងប្អូនត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាងនៃក្រសួង សុខាភិបាល សូមទំនាក់ទំនងតាមរយៈទូរស័ព្ទលេខ៖ ០៨៥ ៥៣ ៨០ ៦៦, ០១២ ២០ ៤៩ ៦៥ ៕

ប្រភព៖ នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង​