រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានបន្តអំពាវ​នាវ​ដល់ប្រទេសជាសមាជិកអង្គការ NATO និងប្រទេសសម្ព័ន្ធមិត្តអាម៉េរិក ជួយទប់ស្កាត់កុំឱ្យ​ប្រើ​ប្រាស់​គ្រាប់បែកចង្កោម ដែលជាអាវុធដ៏កាចសាហាវ ក្នុងសង្គ្រាមរវាងរុស្ស៊ី និង​អ៊ុយក្រែន​នោះ។

​នៅលើបណ្ដាញ Twitter នាព្រលប់ថ្ងៃទី១០ ខែកក្កដា ឆ្នាំ២០២៣ សម្ដេចតេជោ ហ៊ុន សែន បានសរសេរថា៖ «ក្នុងនាមខ្ញុំប្រមុខរាជរដ្ឋាភិបាលកម្ពុជា សូមបន្តអំពាវនាវដល់​ប្រទេស​ជាសមាជិកអង្គការ NATO និងប្រទេសសម្ព័ន្ធមិត្តអាមេរិកមួយចំនួន ដូចជាចក្រភព​អង់គ្លេស អេស្ប៉ាញ អាល្លឺម៉ង់ កាណាដា ដែលសុទ្ធសឹងតែជាប្រទេសហត្ថលេខីនៃ អនុ​សញ្ញា​ហាមឃាត់គ្រាប់បែកចង្កោម សូមមានភាពទទួលខុសត្រូវ និងចូលរួមទប់ស្កាត់​ឱ្យ​ខានតែបាន ទៅដល់ប្រធានាធិបតីអាម៉េរិក ចូ បៃដិន និងប្រធានាធិបតីអ៊ុយក្រែន កុំឱ្យ​ប្រើ​ប្រាស់អាវុធដ៏កាចសាហាវនេះ»។

ដោយឡែក នៅលើបណ្ដាញតេឡេក្រាមកាលពីព្រឹកថ្ងៃទី ០៩ ខែកក្កដា ឆ្នាំ២០២៣ សម្ដេចតេជោក៏បានសរសេរដែរថា ប៉ុន្មានថ្ងៃមកនេះ មានការផ្សាយព័ត៌​មាន​យ៉ាងច្រើនថា សហរដ្ឋអាមេរិកនឹងផ្តល់គ្រាប់បែកចង្កោម ឱ្យទៅអ៊ុយក្រែន ដើម្បីប្រយុទ្ធ​ជាមួយកងទ័ពរុស្ស៊ី។ សម្ដេចតេជោបន្តថា ប្រសិនរឿងនេះ វាជាការពិតមែន វានឹង​ក្លាយ​ទៅ​​ជាគ្រោះថ្នាក់ធំបំផុត សម្រាប់ប្រជាជនអ៊ុយក្រែនរាប់សិបឆ្នាំ ឬដល់រយឆ្នាំទៀតផង ប្រសិនគ្រាប់បែកចង្កោមនេះ យកទៅប្រើប្រាស់ក្នុងតំបន់ដែលរុស្ស៊ីកាន់កាប់ក្នុងទឹកដី​អ៊ុយក្រែន។

សម្ដេចតេជោលើកឡើងថា បទពិសោធន៍ឈឺចាប់របស់កម្ពុជាដែលទទួលការ​ទម្លាក់​​គ្រាប់បែកចង្កោម ពីអាម៉េរិកនាដើមទសវត្សរ៍១៩៧០ មកដល់ពេលនេះ ជាងកន្លះ​សតវត្សរ៍ហើយ នៅមិនទាន់រកវិធីបំផ្លាញចោលអស់នៅឡើយ។ សម្ដេចតេជោគូសបញ្ជាក់​ថា៖ «ខ្ញុំដឹងច្បាស់ថាប្រទេសកម្ពុជាតូច ហើយទន់ខ្សោយសំឡេងគ្មានទម្ងន់ តែដោយក្តី​អាណិត​ប្រជាជនអ៊ុយក្រែន ខ្ញុំសូមអំពាវនាវប្រធានាធិបតីអាម៉េរិកដែលជាអ្នកផ្តល់ និង​ប្រធានាធិបតីអ៊ុយក្រែន ដែលជាអ្នកទទួល សូមមេត្តាកុំប្រើប្រាស់គ្រាប់បែកចង្កោម​ក្នុង​សង្រ្គាម​នេះ ព្រោះអ្នករងគ្រោះពិតប្រាកដគឺប្រជាជនពិសេសគឺអ៊ុយក្រែនតែម្តង»៕

ប្រភព៖ ក្រសួងព័ត៌មាន