រាជធានីភ្នំពេញ៖ យោងតាមការចុះផ្សាយរបស់ ទីភ្នាក់ងារសារព័ត៌មានកម្ពុជា បានឱ្យដឹងថា ក្រុមកីឡាករ កីឡាការិនីជម្រើជាតិកម្ពុជាលើ១២ប្រភេទកីឡា ដែលមានអត្តពលិក​ចំនួន ១៦១នាក់ នឹងត្រូវចេញទៅហ្វឹកហាត់នៅសាធារណរដ្ឋប្រជាមានិតចិន នា​ដើម​​ខែសីហា ឆ្នាំ២០២៣ ដើម្បីត្រៀមព្រឹត្តិការណ៍អន្តរជាតិសំខាន់ៗពីរ គឺការ​ប្រកួត​កីឡាអាស៊ី (ASIAN Games) លើកទី១៩ នៅទីក្រុង Hangzhou ប្រទេសចិន ពីថ្ងៃទី​២៣ ខែកញ្ញា ដល់ថ្ងៃទី០៨ ខែតុលា ឆ្នាំ២០២៣ និងការប្រកួតកីឡាស៊ីហ្គេម លើកទី​៣៣ ឆ្នាំ២០២៥ នៅប្រទេសថៃ។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) ដែលដឹកនាំកិច្ចប្រជុំរៀបចំផែនការហ្វឹកហាត់ប្រទេសចិន កាលពីល្ងាច​ថ្ងៃ​ទី១៧ ខែកក្កដា ឆ្នាំ២០២៣ នៅទីស្នាក់ការ NOCC មានប្រសាសន៍ថា កិច្ចប្រជុំ​ត្រៀម​ហ្វឹកហាត់ នៅប្រទេសចិន នាដើមខែសីហា ឆ្នាំ២០២៣ ​គឺដើម្បីត្រៀមចូលរួម​ប្រកួត​ប្រជែងមេដាយក្នុងព្រឹត្តិការណ៍កីឡាធំៗចំនួនពីរនេះ។ ឯកឧត្ដមបន្ដថា ការហ្វឹក​ហាត់​នៅប្រទេស​ចិន​នេះ គឺជាពេលវេលានៅសល់ប្រហែល ១២០ថ្ងៃទៀត ដែល​ស្ថិតក្នុងកិច្ចព្រម​ព្រៀងរវាង​រាជរដ្ឋាភិបាលកម្ពុជា និងរដ្ឋាភិបាលចិន ដែលជាជំនួយ​ឥតសំណង​របស់​មិត្ត​ចិនសម្រាប់ការហ្វឹកហាត់ត្រៀមនៅសល់​ក្នុងពេល ស៊ីហ្គេម ២០២៣ កន្លង​ទៅ។ ឯកឧត្តមអគ្គលេខាធិការសង្កត់ធ្ងន់ថា៖ «ដើម្បីបន្តនិរន្តរភាពនៃ​គុណផលកីឡាកម្ពុជា យើងត្រូវរៀបចំផែនការយុទ្ធសាស្ត្រហ្វឹកហាត់ឡើងវិញ ក្រោយ​បញ្ចប់ស៊ីហ្គេម នៅកម្ពុជា កាលពីខែឧសភា ឆ្នាំ២០២៣ កន្លងទៅ។ តាម​រយៈ​គម្រោងហ្វឹកហាត់របស់មជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា គឺមានទាំងការហ្វឹកហាត់ ក្នុងស្រុក និងការហ្វឹកហាត់នៅក្រៅប្រទេស ក្នុងនោះការហ្វឹកហាត់នៅប្រទេសចិនជាដើម»។

ឯកឧត្ដមបានបញ្ជាក់ទៀតថា សម្រាប់ការចូលរួមរបស់កម្ពុជា ក្នុងកីឡា​អាស៊ី នៅប្រទេសចិន ២០២៣ គឺមានចំនួន១៦ប្រភេទកីឡា ដោយ១២ប្រភេទ​កីឡា​ត្រូវហ្វឹកហាត់នៅក្នុងប្រទេសចិន ហើយបន្តចូលរួមប្រកួតកីឡាអាស៊ី នៅទីនោះ​តែ​ម្តង។ ក្រោយបញ្ចប់ការប្រកួតកីឡាអាស៊ី និងត្រូវចូលជំរំហ្វឹកហាត់បន្តនៅ​ប្រទេស​ចិនដដែល រហូតដល់ខែធ្នូ ឆ្នាំ២០២៣។ ចំពោះ៤ប្រភេទកីឡាទៀត ដែលហ្វឹកហាត់​ក្នុងស្រុកនឹងត្រូវបញ្ជូនសម្រាប់ការប្រកួតកីឡាអាស៊ីនេះផងដែរ។

«ពេលនេះ យើងបានមូលមតិគ្នាថា នឹងបន្តការងាររដ្ឋបាលកីឡា និងរៀបចំ​អភិវឌ្ឍបច្ចេកទេសកីឡាឡើងវិញ ក្រោយសម្រាកពីការប្រកួតកីឡាស៊ីហ្គេម លើក​ទី​៣២ ឆ្នាំ២០២៣ នៅកម្ពុជាយើង។ យើងនៅមានបេសកកម្មអន្តរជាតិ​ជាច្រើន​ទៀត​សម្រាប់ជាតិមាតុភូមិ ដែលត្រូវបន្តការខិតខំបន្ថែម ដោយយករូបភាពនៃភាព​ជោគជ័យស៊ីហ្គេម ឆ្នាំ២០២៣ នៅកម្ពុជាធ្វើជាកម្លាំងចិត្ត ក្នុងការជំរុញសក្តានុ​ពល​កីឡាកម្ពុជា»។ ឯកឧត្តម វ៉ាត់ ចំរើន បានបញ្ជាក់បន្ថែម។

លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវ​ជន និងកីឡាបានបញ្ជាក់ថា ការហ្វឹកហាត់នៅប្រទេសចិន មានរយៈពេល ១២៥​ថ្ងៃ លើ១២ប្រភេទកីឡាស្មើនឹងចំនួនកីឡាករ កីឡាការិនី ១៦១នាក់ (គម្រោងជំនួយឥត​សំណងចិន) និងផែនការចូលរួមប្រកួតកីឡាអាស៊ី (ASIAN Games) លើកទី១៩ នៅ​ប្រទេសចិន។ លោកបន្ដថា ចំពោះមជ្ឈមណ្ឌលជាតិហ្វឹកហ្វឺនកីឡាកំពុង​ត្រៀម​ប្រមូល​​ផ្តុំការហ្វឹកហាត់របស់ក្រុមជម្រើសជាតិលើប្រភេទកីឡាមួយចំនួន ដែលមិន​បានទៅហ្វឹកហាត់នៅប្រទេសចិន ហើយត្រៀមកីឡាអាស៊ី នៅប្រទេសចិនដែរ។ លោកប្រធានមជ្ឈមណ្ឌលបានស្នើសុំដល់សហព័ន្ធកីឡាជាតិបញ្ជូនបញ្ជីកីឡាករ កីឡាការិនីឱ្យបានទាន់ពេលវេលា ដើម្បីត្រៀមចេញទៅហ្វឹកហាត់នៅ​ប្រទេស​​ចិន ចាប់ពីថ្ងៃទី០១ ខែសីហា ឆ្នាំ២០២៣តទៅ៕

ប្រភព៖ ទីភ្នាក់ងារសារព័ត៌មានកម្ពុជា