សហរដ្ឋ​អាមេរិក​បាន​ប្រកាស​ជំនួយ​យោធា​បន្ថែម​ ដែល​មាន​តម្លៃ​រហូត​ដល់​ ៤០០​ លាន​ដុល្លារ ​ដើម្បី​គាំទ្រ​ការ​វាយលុក​របស់​អ៊ុយក្រែន​ប្រឆាំង​នឹង​រុស្ស៊ី។ កញ្ចប់ដែលដាក់បង្ហាញដោយមន្ទីរបញ្ចកោណរួមមាន៖ គ្រាប់បែកបន្ថែម សម្រាប់ប្រព័ន្ធការពារដែនអាកាស Patriot និងប្រព័ន្ធមីស៊ីលពីដីទៅអាកាសកម្រិតខ្ពស់ NASAMS។ អ៊ុយក្រែន​ក៏​នឹង​ទទួល​បាន​គ្រាប់​រំសេវ​បន្ថែម​ទៀត​ សម្រាប់​ប្រព័ន្ធ High Mobility Artillery Rocket Systems ឬ HIMARS។ សហរដ្ឋអាមេរិក​មានបំណង​បង្កើន​សមត្ថភាព​ការពារ ដែនអាកាស​របស់​អ៊ុយ​ក្រែ​ន ដើម្បី​ទប់ទល់​ការ​វាយប្រហារ​ដោយ​មី​ស៊ី​ល និង​យន្តហោះ​គ្មាន​មនុស្ស​បើក​របស់​រុស្ស៊ី​។

រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងសេចក្តីថ្លែងការណ៍មួយថា រុស្ស៊ីនៅតែបន្តវាយប្រហារកំពង់ផែអ៊ុយក្រែន និងហេដ្ឋារចនាសម្ព័ន្ធនៅ Odesa នៅភាគខាងត្បូង និងតំបន់ផ្សេងទៀត។ លោក Blinken បាននិយាយថា៖ «សហរដ្ឋអាមេរិកនិងសម្ព័ន្ធមិត្ត និងដៃគូរបស់យើង នឹងឈររួបរួមជាមួយអ៊ុយក្រែនដរាបណាពួកគេនៅត្រូវការ»។ ប្រធានាធិបតីអ៊ុយក្រែនលោក Volodymyr Zelenskyy ក៏បានសម្តែងការដឹងគុណ នៅក្នុងវីដេអូដែលមួយបានចេញផ្សាយកាលពីថ្ងៃអង្គារផងដែរ។ លោក Zelenskyy បាននិយាយថា ចាប់ផ្តើមថ្ងៃថ្មីដោយការទទួលអាវុធ និងកញ្ចប់ជំនួយការពារជាតិថ្មី រួមទាំងរបស់ដែលផ្ដល់ដោយអាមេរិក។ គាត់​បាន​បន្ថែម​ថា៖«ខ្ញុំ​សូមថ្លែងអំណរគុណ​សម្រាប់​កញ្ចប់​ថ្ងៃ​នេះ… អរគុណ​អាមេរិក!»៕

អត្ថបទ៖ លីដា
ប្រភព៖ NHK