បើតាមការចុះផ្សាយរបស់សារព័ត៌មាន BBC បានរាយការណ៍ថា លោកស្រី អ៊ុងសាន ស៊ូជី ត្រូវបានផ្លាស់ទៅឃុំខ្លួនក្នុងផ្ទះ បន្ទាប់ពីយោធាមីយ៉ាន់ម៉ាបានចាប់ខ្លួនលោកស្រី តាំងតែពីរដ្ឋប្រហារកាលពីខែកុម្ភៈ ឆ្នាំ២០២១។ ប្រភពពីពន្ធនាគារបានប្រាប់ថា លោកស្រី ស៊ូជី ត្រូវបាននាំទៅកាន់អគាររដ្ឋាភិបាលក្នុងទីក្រុងណៃពិដោ កាលពីថ្ងៃចន្ទដើមសប្ដាហ៍។ អតីតមេដឹកនាំអាយុ ៧៨ឆ្នាំរូបនេះ បានចំណាយពេលមួយឆ្នាំនៅក្នុងការឃុំឃាំងតែម្នាក់ឯង មុនការផ្លាស់ទៅឃុំខ្លួនក្នុងផ្ទះ ក្រោយតុលាការយោធាបានកាត់បិទទ្វារកាត់ក្តីឱ្យគាត់ជាប់ពន្ធនាគាររយៈពេល ៣៣ឆ្នាំ។

គ្មានការបញ្ជាក់ណាមួយអំពីការផ្ទេរលោកស្រីចេញពីពន្ធនាគារនោះទេ ប៉ុន្តែការផ្លាស់ទៅឃុំខ្លួនក្នុងផ្ទះអាចជាសញ្ញាវិជ្ជមានពីអាជ្ញាធរ ដែលបានប្រឈមមុខនឹងការអំពាវនាវជាច្រើន ដើម្បីដោះលែងមេដឹកនាំដែលជាប់ឆ្នោតតាមលទ្ធិប្រជាធិបតេយ្យរូបនេះ។ មានពាក្យចចាមអារ៉ាមបាននិយាយថា លោកស្រី ស៊ូជី ​មាន​ជំងឺ ប៉ុន្តែ​យោធា​បាន​បដិសេធ​របាយការណ៍​នោះ។ កាលពីដើមសប្តាហ៍នេះ ប្រភពពីពន្ធនាគារណៃពិដោ ដែលគាត់កំពុងត្រូវបានឃុំខ្លួន បានប្រាប់ថា គាត់មានសុខភាពល្អធម្មតាទេ។ រដ្ឋមន្ត្រីការបរទេសថៃក៏បានបង្ហើបក្នុងខែនេះថា លោកបានទៅសួរសុខទុក្ខលោកស្រី ស៊ូជី ប៉ុន្តែលោកមិនបានបង្ហាញព័ត៌មានលម្អិតបន្ថែមនោះទេ៕

អត្ថបទ៖ លីដា
ប្រភព៖ BBC