អ៊ីតាលី៖ យ៉ាងហោចណាស់មនុស្ស ១១ នាក់ ដែលបានធ្វើដំណើរតាមជើងហោះហើរ Delta Airlines ត្រូវបានគេបញ្ជូនទៅមន្ទីរពេទ្យ កាលពីថ្ងៃអង្គារ ទី២៩ ខែសីហា បន្ទាប់ពីបានជួបនូវភាពចលាចលយ៉ាងធ្ងន់ធ្ងរ មុនពេលចុះចតនៅទីក្រុងអាត្លង់តា។ អ្នកនាំពាក្យរបស់ក្រុមហ៊ុន Delta បាននិយាយថា យន្តហោះបានដឹកអ្នកដំណើរ ១៥១នាក់ និងសមាជិកយានិក ១៤នាក់ មកពីទីក្រុងមីឡាន នៅពេលដែលភាពចលាចលបានកើតឡើង ហើយទំហំ​នៃការរងរបួសនៅមិន​ទាន់​ដឹង​ច្បាស់​នៅ​ឡើយទេ។

អ្នកនាំពាក្យបាននិយាយថា៖«សមាជិកក្រុម Delta Care កំពុងចល័តសមាជិកដើម្បីភ្ជាប់ទំនាក់ទំនងជាមួយអតិថិជននៅលើយន្តហោះ Delta Flight 175 ដែលបានជួបប្រទះនូវភាពជ្រួលច្របល់យ៉ាងធ្ងន់ធ្ងរ មុនពេលចុះចតដោយសុវត្ថិភាពក្នុងទីក្រុងអាត្លង់តាកាលពីថ្ងៃអង្គារ»។ យោងតាមទីភ្នាក់ងារអាកាសចរណ៍សហព័ន្ធបានឱ្យដឹងថា ជើងហោះហើរនេះស្ថិតនៅចម្ងាយប្រហែល ៤០ម៉ាយ ភាគឦសាននៃអាកាសយានដ្ឋាន Hartsfield-Jackson នៃទីក្រុងអាត្លង់តា នៅពេលដែលភាពចលាចលបានកើតឡើង ហើយទីបំផុតវាបានចុះចតដោយសុវត្ថិភាព៕

អត្ថបទ៖ លីដា
ប្រភព៖ CNN