រឿងទាំង ១០ ដែលអ្នកមិនគួរធ្វើពេលទៅទស្សនាប្រទេសថៃក្នុង ឆ្នាំ២០១៩ នេះ

មានកន្លែងកម្សាន្ត និងរឿងជាច្រើន ដែលជំរុញចិត្តអ្នកនៅពេលដែលលោកអ្នកបានមកកាន់ប្រទេសអាស៊ីមួយដ៏មានប្រជាប្រិយ និងស្រស់ស្អាតមួយនេះ។ ប៉ុន្តែយ៉ាងណាក៏ដោយទន្ទឹមនឹងការកម្សាន្តដ៏សម្បូរបែប វានៅតែមានរឿងមួយចំនួនដែលអ្នកគួរតែដឹង និងជៀសវាងកុំប្រព្រឹត្តឱ្យសោះ ទោះបីជាវាមើលទៅទំនងក៏ដោយ។ ហើយអត្ថបទនេះនឹងណែនាំអស់លោកអ្នកឱ្យដឹងនូវ ១០ចំណុច ដែលអ្នកគប្បីកុំធ្វើឱ្យសោះពេលទៅទស្សនាប្រទេសថៃ៖

១. ហែលទឹកនៅឆ្នេរសមុទ្រ Andaman ភាគខាងត្បូងក្នុងរដូវវស្សា៖ ជារៀងរាល់ឆ្នាំមានមនុស្សប្រហែល ៥០នាក់ បានលង់ទឹកស្លាប់នៅតាមបណ្តោយឆ្នេរសមុទ្រភាគខាងលិចភូកេត។ ភាគច្រើននៅក្នុងរដូវវស្សា ដែលមានខ្យល់មូសុងនៅភាគនិរតី បក់បោកបក់លើឆ្នេរ Andaman នេះ។

២. ជួលម៉ូតូ៖ អាចមានករណីខ្លះលោកអ្នកគ្រាន់តែមាន Passport គឺអាចខ្ចីម៉ូតូបានហើយ ប៉ុន្តែអ្វីដែលអ្នកគួរតែដឹងគឺ អ្នកមិនគួរឱ្យនរណាស្គាល់ ឬចម្លង Passport របស់អ្នកនោះឡើយ។ ម៉្យាងទៀតអ្នកគួរតែដឹងថា ផ្លូវនៅក្នុងប្រទេសថៃ គឺជាផ្លូវដែលសម្បូរគ្រោះថ្នាក់បំផុតជាពិសេសបើអ្នកមានអាយុក្រោម ៣០ឆ្នាំ ហានិភ័យគឺកាន់តែខ្ពស់។

៣. ទៅលេងសត្វខ្លា ឬការសម្តែងសត្វ៖ សត្វល្មូន សត្វស្លាប ក្រពើ ខ្លា ផ្សោត និងសត្វផ្សេងៗទៀត សុទ្ធតែមិនមែនជាសត្វចិញ្ចឹម។ តើវាចាំបាច់ដែរទេដែលអ្នកនឹងទៅមើលការសម្តែងរបស់វា? ជាការពិតវាសម្រេចលើអ្នក ប៉ុន្តែអ្នកគួរដឹងថា សត្វព្រៃទាំងនោះគឺមិនមែនកើតមកដើម្បីតែជាប់ច្រវ៉ាក់ ឬសម្តែងជាអ្វីមួយដើម្បីកម្សាន្តភ្នែកមនុស្សនោះទេ។

៤. ចូលទៅសួនសត្វ៖ សួនសត្វនៅតំបន់អាស៊ីគឺនៅមានលក្ខណៈបូរាណនៅឡើយ។ អ្នកប្រហែលជាអាចគិតថា សួនសត្វនឹងផ្តល់ផាសុកភាពដល់សត្វទាំងនោះ ប៉ុន្តែជាក់ស្តែងសត្វមួយចំនួនគឺមានតែស្បែកដណ្ដប់ឆ្អឹង និងមិនមានផាសុកភាពឡើយ ដោយសាររបៀបនៃការថែរក្សារបស់ពួកគេនៅមានកម្រិត។

៥. ជិះលើខ្នងដំរី៖ ជាការពិតនៅថៃគឺសម្បូរសត្វដំរី និងជុំរំដំរីណាស់ ប៉ុន្តែឥលូវនេះច្បាប់កាន់តែតឹងរ៉ឹងថែមទៀត ដែលទំនាក់ទំនងរវាងសត្វ និងមនុស្សនឹងត្រូវបានហាមឃាត់ សូម្បីតែការចិញ្ចឹម និងលាងដំរីក៏ដោយ។

៦. ទៅរត់ហាត់ប្រាណក្នុងអំឡុងពេលថ្ងៃ៖ នៅប្រទេសថៃភាគច្រើនគេប្រារព្ធកម្មវិធីរត់ផ្សេងៗ ចាប់ពីម៉ោងប្រហែល ៤-៥ព្រឹក ក៏ព្រោះថាអាកាសធាតុនៅក្នុងប្រទេសនេះគឺក្តៅខ្លាំងណាស់។

៧. ឡើងជិះតាក់ស៊ី ឬតុកតុក ដោយមិនតថ្លៃជាមុន៖ តំបន់ទេសចរណ៍ភាគច្រើននៅក្នុងប្រទេសថៃ សម្បូរដោយតុកតុក និងតាក់ស៊ី ដើម្បីរងស់ចាំបម្រើភ្ញៀវទេសចរណ៍ជាមួយនឹងតម្លៃសមរម្យ ប៉ុន្តែក៏នៅមានកន្លែងមួយចំនួនដែលតាក់ស៊ី ឬតុកតុកទាំងនោះមានតម្លៃថ្លៃដោយហេតុផលផ្សេងៗ ដូច្នេះអ្នកគួរតែនិយាយថ្លៃជាមួយពួកគេជាមុនសិន។

៨. កុំចុះហត្ថលេខាផ្តេសផ្ដាស៖ ជាការពិតណាស់ អ្នកមិនគួរចុះហត្ថលេខាលើអ្វិឱ្យសោះ ប្រសិនបើវាពុំមានការយល់ស្របពីមន្ត្រីថៃ ឬជាមេធាវីបរទេស។ អ្នកស្ថិតនៅក្នុងប្រទេសដទៃ អ្នកគួរប្រយ័ត្នឱ្យបានខ្ពស់បំផុត មិនថាអ្នកចង់ចាប់ផ្តើជំនួញអ្វីមួយ។

៩. ឈ្លោះជាមួយមន្ត្រីប៉ូលិសថៃ៖​ កុំឈ្លោះជាមួយពួកគេឱ្យសោះ! ករណីបើអ្នកមានបញ្ហាអ្វីមួយ អ្នកត្រូវឱ្យដំណឹងដល់ពួកគេ ប៉ុន្តែហាមដាច់ខាតរឿងឆេវឆាវជាមួយពួកគេ អ្នកអាចត្រូវបានអូសចូលគុកដោយភាពឆេវឆាវនេះ។

១០. ចុងក្រោយគឺការស្លៀកពាក់៖ សម្រាប់ជនជាតិប៉ែកខាងលិច ការស្លៀកពាក់របស់ពួកគេមានការខុសប្លែកពីពួកអាស៊ី។ អ្នកគួរប្រយ័ត្នរឿងស្លៀកពាក់នេះ បើអ្នកមិនច្បាស់ថា ស្លៀកពាក់បែបណាសមរម្យអ្នកអាចសួរអ្នកស្រុកនៅទីនោះបន្ថែមដើម្បីកុំឱ្យមានការស្លៀកពាក់របស់អ្នកមិនសមរម្យ៕

អត្ថបទ៖ លីដា
ប្រភព៖ thethaiger