នៅព្រឹកថ្ងៃអង្គារ ៥កើត ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹង​ថ្ងៃ​ទី១៩ ខែកញ្ញា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា បានបន្តអញ្ជើញចុះជួប​សំណេះ​សំណាលជាមួយកម្មករ និយោជិតសរុប ១៨,១០៤នាក់ទៀត មកពីរោងចក្រ សហគ្រាស​​នានា​​ ក្នុងស្រុកបាទី ខេត្តតាកែវ។

នាឱកាសនោះ សម្តេចធិបតី ហ៊ុន ម៉ាណែត បានថ្លែងថា សម្តេចបានណែនាំឱ្យមានការអនុគ្រោះតម្លៃអគ្គិសនីជូនទៅរោងចក្រ សហគ្រាសផ្នែកឧស្សាហកម្ម និងកសិកម្មជាង ២ម៉ឺនរោងចក្រ សហគ្រាសចុងឆ្នាំ២០២៣នេះ។

សម្តេចធិបតី ហ៊ុន ម៉ាណែត បានមានប្រសាសន៍ថា៖ « កាលពីល្ងាចមិញ ខ្ញុំបានឱ្យឯកឧត្តម កែវ រតនៈ ពិនិត្យមើលលទ្ធភាព អាចសាកល្បងក្នុង ៣ខែនេះ ជាពិសេសចុងឆ្នាំនេះ យើងអាចពិនិត្យមើលនៅក្នុងអនុគ្រោះថ្លៃអគ្គិសនី កម្រិតណាមួយ ជាពិសេស បើមិនបានគ្រប់សហគ្រាសទាំងអស់ទេ ក៏បានខ្លះ ជាពិសេសសហគ្រាសនៅក្នុងឧស្សាហកម្ម កសិកម្ម ដែលផលិតច្រើន ព្រោះគាត់ត្រូវការប្រើច្រើនដែរ ចឹងទេអាចពិនិត្យមើលដើម្បីឱ្យពួកគាត់មានលទ្ធភាពអាចពង្រីកថែមទៀត កាលណាពង្រីកច្រើននាំចេញក៏ច្រើន ការងារក៏ច្រើនថែមទៀត បើមិនថែមម៉ោងឱ្យបុគ្គលិកដែលមានស្រាប់បានចំណូលបន្ថែម ក៏រកបុគ្គលិកថ្មីដែរ»។

សម្តេចធិបតី បានគូសបញ្ជាក់ថា ការជួយទៅលើរោងចក្រ សហគ្រាស ឱ្យសន្សំសំចៃទៅលើរឿងភ្លើងនេះ គឺអាចឱ្យរោងចក្រសន្សំសំចៃពីភ្លើង យកមកតម្លើងប្រាក់ខែឱ្យបុគ្គលិក។ ជាមួយគ្នានេះដែរ យោងតាមការលើកឡើងរបស់ ឯកឧត្តម កែវ រតនៈ មានរោងចក្រ​សហគ្រាសចំនួន ២១០០០ រោងចក្រដែលអាចនឹងទទួលបានការអនុគ្រោះតម្លៃអគ្គិសនី៕

អត្ថបទ៖ លីនី