ក្រសួងសុខាភិបាល នឹងចាត់វិធានការយ៉ាងតឹងរ៉ឹងទៅលើឈ្មោះ អ៊ុច សម្បត្តិ និងបក្សពួក ទៅតាមផ្លូវច្បាប់ជាធរមាន
(ភ្នំពេញ)៖ កាលពីថ្ងៃទី៣០ ខែកញ្ញា ឆ្នាំ២០២៣នេះ ក្រសួងសុខាភិបាល បានចេញសេចក្តីប្រកាសព័ត៌មាន ស្តីពីផលិតផលបំប៉នសុខភាព GINSENG PRO របស់គ្រឹះស្ថានអាហរ័ណ នីហរ័ណ ឱសថគ្រួសារកក់ក្តៅ ឯ.ក។ ក្នុងនោះ ក្រសួងសុខាភិបាល បានបញ្ជាក់ថា នឹងចាត់វិធានការយ៉ាងតឹងរ៉ឹងទៅលើឈ្មោះ អ៊ុច សម្បត្តិ ដែលមានងារជាឧកញ៉ា និងបក្សពួក ទៅតាមផ្លូវច្បាប់ជាធរមាន។
យោងតាមសេចក្តីប្រកាសព័ត៌មានរបស់ក្រសួងសុខាភិបាល នៅយប់ថ្ងៃទី៣០ ខែកញ្ញា ឆ្នាំ២០២៣ បានលើកឡើងថា ក្រោយពីបានទទួលស្គាល់កំហុសរបស់ខ្លួន គ្រឹះស្ថានអាហរ័ណ នីហរ័ណឱសថ គ្រួសារកក់ក្ដៅ ឯ.ក នៅតែមិនគោរព និងមិនអនុវត្តតាមខ្លឹមសារនៃកិច្ចសន្យា ថែមទាំងបានចេញលិខិតបំភ្លឺជាសាធារណៈលេខ ៣៦៨/HHB/៣២ ចុះថ្ងៃទី២៣ ខែកញ្ញា ឆ្នាំ២០២៣ តាមរយៈមេធាវីតំណាងរបស់ខ្លួន ដោយធ្វើការវាយប្រហារមកលើក្រសួងសុខាភិបាល ធ្វើឱ្យសាធារណជនមានការភាន់ច្រឡំ និងយល់ខុសទៅលើចំណាត់ការតាមផ្លូវច្បប់របស់ក្រសួងសុខាភិបាល ដែលបានធ្វើកន្លងមក។
ក្រសួងបន្ថែមទៀតថា រហូតមកដល់ពេលនេះ ឈ្មោះ អ៊ុច សម្បត្តិ និងបក្ខពួក នៅតែមិនគោរព និងមិនអនុវត្តតាមវិធានការរបស់ក្រសួងជំនាញ ហើយបន្ដធ្វើសកម្មភាពវាយប្រហារមកលើក្រសួងសុខាភិបាល ដោយពុំមានមូលដ្ឋានសមស្រប និងមានចេតនាញុះញង់បង្កចលាចល ព្រមទាំងបំពុលបរិយាកាសនៅក្នុងសង្គម។ ក្រសួងសុខាភិបាលនឹងចាត់វិធានការយ៉ាងតឹងរ៊ឺងលើ ឈ្មោះ អ៊ុច សម្បត្តិ និងបក្ខពួកទៅតាមផ្លូវច្បាប់។ សូមអានសេចក្តីប្រកាសព័ត៌មានលម្អិតនៅខាងក្រោម៖
អត្ថបទ៖ និស្ស័យ
ប្រភព៖ ក្រសួងសុខាភិបាលនៃព្រះរាជាណាចក្រកម្ពុជា