សម្ដេចតេជោ ហ៊ុន សែន ថ្លែងថា មិនមានការត្រៀមយន្តហោះពិសេសទៅជម្លៀសនិស្សិត និងពលរដ្ឋកម្ពុជា រត់ចោលប្រជាជនអ៉ីស្រាអែលឡើយ

នៅក្នុងឱកាសអញ្ជើញជាអធិបតីបិទ ការថតខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» នៅ OCIC ជ្រោយចង្វារ នារសៀលថ្ងៃទី០៩ ខែតុលា ឆ្នាំ២០២៣ នេះ​ សម្ដេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ បានមានប្រសាសន៍ថា មិនមានការត្រៀមយន្តហោះពិសេស ដើម្បីទៅដឹកជម្លៀសនិស្សិត និងពលរដ្ឋ ដែលកំពុងសិក្សានៅប្រទេស អ៉ីស្រាអែលឡើយ បើអ៊ីស្រាអែល មិនតម្រូវឱ្យយើងចាកចេញពីប្រទេសគេនោះទេ យើងនៅតែបន្តរស់នៅជាមួយប្រជាជនអ៊ីស្រាអែល យើងមិនរត់ចោលប្រជាជនអ៊ីស្រាអែលនោះទេ។

សម្ដេចតេជោ បានមានប្រសាសន៍ថា៖ « ប្រទេសមួយចំនួនត្រៀមយន្តហោះទៅដឹក និស្សិត និងពលកររបស់គេ ពីអ៉ីស្រាអែល។ អំបាញ់មិញនាយករដ្ឋមន្រ្តី ហ៊ុន ម៉ាណែត បានប្រាប់ខ្ញុំថា យើងមិនមានលទ្ធភាពធ្វើបែបនេះទេ ព្រោះប្រជាជនអ៉ីស្រាអែលគេរស់នៅរបៀបណា យើងរស់នៅរបៀបហ្នឹង ប្រសិនបើប្រជាជន និងរដ្ឋាភិបាលអ៉ីស្រាអែល មិនត្រូវឱ្យយើងចាកចេញទេ យើងកុំចាកចេញរត់ចោលប្រជាជនអ៉ីស្រាអែល។ ប្រសិនបើរត់ចោលអ៉ីស្រាអែល ក្នុងពេលដែលប្រជាជនអ៉ីស្រាអែល កំពុងជួបការលំបាក ថ្ងៃក្រោយកុំចាំបាច់សុំទៅរៀន ឬសុំទៅធ្វើការនៅអ៉ីស្រាអែលតទៅទៀត។

សម្ដេចតេជោ ហ៊ុន សែន បានគូសបញ្ជាក់បន្ថែមផងដែរថា ៖ «ក្នុងករណីដែលរដ្ឋាភិបាលអ៉ីស្រាអែលថា​ ចាំបាច់ត្រូវតែជម្លៀសពលរដ្ឋ និស្សិត កម្ពុជាចេញ យើងកុំខ្លាចជាមួយនឹងការចំណាយប្រាក់ជួលយន្តហោះពិសេស ទៅដឹកនិស្សិតរបស់យើងជាង ៤០០នាក់ចាកចេញបីអ៉ីស្រាអែល » ៕

អត្ថបទ៖ លីនី