ដំណឹងល្អ! គហបតីនៅកូរ៉េខាងត្បូងមួយក្រុម សម្រេចផ្ដល់អាហារូបករណ៍ដល់សិស្សនិស្សិតកម្ពុជា តាមរយៈកីឡាការិនីឆ្នើម ស្រួង ភាវី
គហបតីមួយក្រុមនៅប្រទេសកូរ៉េខាងត្បូង បានសម្រេចចិត្តថានឹងផ្ដល់អាហារូបករណ៍ដល់សិស្សនិស្សិតកម្ពុជា តាមរយៈអ្នកនាង ស្រួង ភាវី ដែលត្រូវបានគេស្គាល់ថាជាម្ចាស់មេដាយមាស លើវិញ្ញាសាប៊ីយ៉ាការ៉ុម (៣បាំង) ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។
កីឡាការិនីឆ្នើមរូបនេះ បានបង្ហោះខ្លឹមសាររួមជាមួយនឹងរូបថតនៅលើផេកផ្លូវការរបស់ខ្លួនកាលពីថ្ងៃទី២៨ ខែធ្នូ ថា៖ « ថ្ងៃនេះខ្ញុំនាំដំណឹងល្អមួយទៀតជម្រាបពុកម៉ែបងប្អូន។ នាងខ្ញុំត្រូវបាន គហបតីមួយក្រុមអញ្ជើញជាភ្ញៀវកិត្តិយសដ៏ពិសេស ចូលរួមក្នុងកម្មវិធីជជែកអំពីកិច្ចការមនុស្សធម៌ ដែលពួកគាត់សុទ្ធសឹងតែជាជនសប្បុរស និងជាអ្នកតាមដាន គាំទ្ររាល់សកម្មភាពរបស់ខ្ញុំកន្លងមក ហើយក៏មានការប្រកួតកីឡាស្នូកឃ័រជាមួយខ្ញុំផងដែរ។ ក្នុងកិច្ចពិភាក្សាពួកគាត់បានប្រាប់ខ្ញុំថា កន្លងមក និងបច្ចុប្បន្នពួកគាត់ផ្ដល់អាហារូបករណ៍ដល់សិស្សពូកែ ជាច្រើនប្រទេស ក្នុងនោះមិនមានខ្មែរយើងនៅឡើយទេ។ ពួកគាត់បន្ថែមថា កម្ពុជាមិនខ្វះទេមនុស្សពូកែៗ ព្រោះធ្លាប់ជាអាណាចក្រដ៏រុងរឿងមួយនៅលេីពិភពលោក។ ជាធម្មតាទេកូរ៉េក៏ធ្លាប់ដួលរំលំដែរនៅអំឡុងឆ្នាំ៥០ តែដោយសារស្មារតីរបស់ប្រជាជនតេីពួកយើងមានថ្ងៃនេះ។ កម្ពុជាពេលនេះមានភាវីជាសក្ខីភាព ដែលបញ្ជាក់ថាជនជាតិខ្មែរជាពូជអ្នកខ្លាំងពូកែ មានបេះដូងចែករំលែក ហើយឧស្សាហ៍ព្យាយាមទៀត។ ដូច្នេះពួកយើងសម្រេចថានឹងផ្ដល់អាហារូបករណ៍ដល់សិស្សនិស្សិតកម្ពុជា តាមរយៈភាវីតែម្ដង ហើយម្យ៉ាងទៀតបេីភាវីត្រូវការឱ្យពួកយើងជួយក្នុងកិច្ចការផ្សេងៗទៀត ពួកយើងនឹងជួយតាមដែលអាចធ្វើបាន។ នាងខ្ញុំពិតជាសប្បាយរីករាយណាស់ ព្រោះថាកិច្ចការដែលខ្ញុំត្រូវនាំប្អូនៗមកព្យាបាល មករៀនសូត្រនៅកូរ៉េកាន់តែងាយស្រួល កាន់តែទូលំទូលាយ ដោយមានជនជាសប្បុរសជាច្រើនចាំជួយនាងខ្ញុំ។ នេះក៏ព្រោះតែការប្ដេជ្ញាចិត្ត ការតស៊ូ ការលះបង់ ដេីម្បីប្រជាជនទេីបខ្ញុំមានថ្ងៃនេះ និងបានទទួលការជួយពីពួកគាត់ដល់ប្រជាជនខ្មែរយើង។ ជំនួសឱ្យប្រជាជនកម្ពុជា ខ្ញុំសូមអរគុណពួកគាត់ទុកនៅក្នុងទីនេះដោយសេចក្ដីគោរព »៕
អត្ថបទ៖ លីនី
ប្រភព៖ Sruong Pheavy