ខេត្តកំពង់ស្ពឺ៖ នៅថ្ងៃទី០៤ ខែកុម្ភៈ ឆ្នាំ២០២៤ យោងតាមការចុះផ្សាយរបស់ ស្នងការដ្ឋាននគរបាលខេត្តកំពង់ស្ពឺ បានឱ្យដឹងថា ដោយអនុវត្ដបទបញ្ជាលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ កំលាំងនគរបាលដាក់គោលដៅត្រួតពិនិត្យអនុវត្តច្បាប់ចរាចរណ៍ផ្លូវគោក(តេស្តពិនិត្យជាតិអាល់កុល) នៅចំណុចភូមិស្តៅឯម ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ បានធ្វើការឃាត់ក្រុមក្មេងទំនើងមួយក្រុមឈ្មោះ BTK (ប៊ី ធី ខេ) BON TEAY KHMER (បន្ទាយខ្មែរ) ស្រែកឡូឡាគេចពីការត្រួតពិនិត្យគោលដៅ។

ក្រុមក្មេងទំនើងរួមមាន៖
១/ឈ្មោះ ដារ៉ា ពន្លឺ ភេទប្រុស ១៨ឆ្នាំ ភូមិច្រេស ឃុំយុទ្ធសាមគ្គី
២/ឈ្មោះ លីម លឿង ភេទប្រុស ១៨ឆ្នាំ ភូមិសំបួរ ឃុំជើងរាស់
៣/ឈ្មោះ សុង រក្សា ភេទប្រុស ១៦ឆ្នាំ ភូមិអង្គតាប៉ុក ឃុំជើងរាស់
៤/ឈ្មោះ ចាន់ ប៉េងសុង ភេទប្រុស ១៦ឆ្នាំ ភូមិសួសនៃ ឃុំជើងរាស់។

ម៉ូតូចំនួន០២គ្រឿង៖
១/ម៉ាក125cc ឆ្នាំ២០១៩ ពណ៌ខ្មៅ ស្លាកលេខ កំពង់ស្ពឺ1O-7114 លេខតួម៉ាស៊ីន ND125ME-5518610 ។
២/ម៉ាក125cc ឆ្នាំ២០២៤ ពណ៌ខ្មៅ ស្លាកលេខ ភ្នំពេញ 1KM-1198 លេខតួម៉ាស៊ីនND125ME-0105774 ។

តាមការបញ្ជាក់ពីលោកវរសេនីយ៍ឯក ខឹម សាម៉ុន អធិការនគរបាលស្រុកសាមគ្គីមុនីជ័យ ប្រាប់ថា៖ ប្រវត្តិនៃក្រុមក្មេងទំនើងរហ័សនាម BTK (ប៊ី ធី ខេ) BON TEAY KHMER (បន្ទាយខ្មែរ) កន្លងមកសមត្ថកិច្ចបានបើកប្រតិបត្ដិការស្រាវជ្រាវតាមរកក្រុមបង្ហោះម៉ូតូនេះជាយូរមកហើយ ក្រោយក្រុមនេះកាន់ដាវ ជិះម៉ូតូតាមដងផ្លូវសាធារណៈយប់ថៃ្ងស្រែកឡូឡា បង្កភាពវឹកវរអាណាធិបតេយ្យ។

បច្ចុប្បន្នក្រុមក្មេងទំនើង ត្រូវបានយកមកសាកសួរនៅអធិការដ្ឋាននគរបាលស្រុកសាមគ្គីមុនីជ័យ ដើម្បីស្នើសុំឲ្យអាជ្ញាធរមូលដ្ឋាន អាណាព្យាបាលមកទទួលខុសត្រូវចំពោះសកម្មភាពក្រុមនេះ៕ ទស្សនាវីដេអូខាងក្រោម៖

ប្រភព៖ ស្នងការដ្ឋាននគរបាលខេត្តកំពង់ស្ពឺ