មន្ត្រីក.ប.ប. ចុះអង្កេតបឋម គឺមិនបានរកឃើញវត្តមាន ផលិតផលម្សៅទឹកដោះគោក្លែងក្លាយម៉ាក Sica និងម៉ាក HIUP ដូចក្នុងព័ត៌មានដែលបានផ្សព្វផ្សាយនោះទេ

រាជធានីភ្នំពេញ៖ នៅថ្ងៃទី១៧ ខែមិថុនា ឆ្នាំ២០២៤ យោងតាមការចុះផ្សាយរបស់ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានចេញសេចក្ដីជូនដំណឹងរបស់អគ្គនាយកដ្ឋាន ក.ប.ប. ពាក់ព័ន្ធនិងការចុះផ្សាយតាមបណ្ដាលសង្គមមួយចំនួន អំពីផលិតផលម្សៅទឹកដោះគោក្លែងក្លាយ ម៉ាក Sica និង ម៉ាក HIUP និងផលិតផលអាហារបំប៉នជាច្រើនផ្សេងទៀត ដែលបានរត់ពន្ធពីប្រទេសវៀតណាមចូលទៅប្រទេសថៃឡង់ដ៍ ហើយត្រូវបានអាជ្ញាធរមានសមត្ថកិច្ចនៃប្រទេសថៃឡង់ដ៍បានរកឃើញ និងចាប់រឹបអូសបាន។

អគ្គនាយកដ្ឋាន ក.ប.ប. បានឱ្យដឹងថា ការរកឃើញនេះ គឺមានគេហទំព័រមួយដែលបានផ្សាយពាណិជ្ជកម្មដោយ អះអាងគួរឱ្យសង្ស័យអំពីផលិតផលម្សៅទឹកដោះគោបង្ហាញពីអត្ថប្រយោជន៍ហួសហេតុ និងបានណែនាំថា ផលិតផលទាំងនោះគឺលក់ដាច់ជាងគេលេខ១ នៅក្នុងប្រទេសណូវ៉ែលហ្សេឡង់ ហើយត្រូវបានចែករំលែកយ៉ាង ទូលំទូលាយនៅលើវេទិកាប្រព័ន្ធផ្សព្វផ្សាយសង្គមផ្សេងៗ។

ក្រោយពីបានទទួលការណែនាំដ៏ខ្ពង់ខ្ពស់ពី លោកជំទាវរដ្ឋមន្ត្រីក្រសួងពាណិជ្ជកម្ម ពាក់ព័ន្ធ នឹងព័ត៌មានអំពីហេតុការណ៍នេះនៅលើបណ្តាញសង្គម អគ្គនាយកដ្ឋានការពារអ្នកប្រើប្រាស់ កិច្ចការប្រកួត ប្រជែង និងបង្ក្រាបការក្លែងបន្លំ “ក.ប.ប. នៃក្រសួងពាណិជ្ជកម្ម ដែលមានតួនាទី និងការកិច្ចលើកិច្ចការពារ អ្នកប្រើប្រាស់ បានចាត់វិធានការភ្លាមៗ ដូចខាងក្រោម៖

១- បានធ្វើការស្រាវជ្រាវលម្អិតបន្ថែមលើខ្លឹមសារដែលបានកើតឡើង និងបានចាត់វិធានការអង្កេតទីផ្សារ គោលដៅ ម៉ាត ផ្សារទំនើប និងទីតាំងលក់ម្សៅទឹកដោះគោ ក្នុងរយៈពេល៣ថ្ងៃ ចាប់ពីថ្ងៃទី១៥ ដល់ថ្ងៃ ទី១៧ ខែមិថុនា ឆ្នាំ២០២៤ ដើម្បីស្វែងរកផលិតផលជាមុខសញ្ញាតាមដានដូចក្នុងព័ត៌មានដែលបានផ្សព្វផ្សាយ។

២-ជាលទ្ធផលនៃការចុះអង្កេតបឋម គឺមន្ត្រីស៊ើបអង្កេតនៃអគ្គនាយកដ្ឋាន ក.ប.ប. មិនបានរកឃើញវត្តមាន នៃផលិតផលជាមុខសញ្ញាតាមដានដូចក្នុងព័ត៌មានដែលបានផ្សព្វផ្សាយនោះទេ៕

អគ្គនាយកដ្ឋាន ក.ប.ប. ដែលជាសេនាធិការ នៃក្រសួងពាណិជ្ជកម្ម និងគណៈកម្មាធិការជាតិការពារ អ្នកប្រើប្រាស់ នឹងបន្តតាមដានលើករណីនេះយ៉ាងយកចិត្តទុកដាក់ ដើម្បីការពារសុខភាពប្រជាពលរដ្ឋដែលជា អ្នកប្រើប្រាស់ និងសូមអំពាវនាវដល់សាធារណជនទាំងអស់ ពិសេសមាតាបិតា ឬអាណាព្យាបាល ដែលតែងតែ ទិញផលិតផលម្សៅទឹកដោះគោ និងផលិតផលអាហារបំប៉ននានា ប្រសិនបើបានជួបប្រទះលើផលិតផលជា មុខសញ្ញាតាមដានទាំងនេះ សូមមេត្តាផ្តល់កិច្ចសហការឬផ្តល់ព័ត៌មានមកអគ្គនាយកដ្ឋាន ក.ប.ប. ៕

ប្រភព៖ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF