ឥណ្ឌូណេស៊ីប្រកាសនឹងបិទទ្វារកោះកូម៉ូដូពេញ ១ឆ្នាំ ដោយសារមានជនខិលខូចលួចលក់សត្វត្រកួតយក្ស ដែលជាសម្បត្តិរបស់កោះតាមអនឡាញ

យោងតាមសារព័ត៌មាន CNN បានឱ្យដឹងថា រដ្ឋាភិបាលឥណ្ឌូណេស៊ីប្រកាសថា នៅខែមករា ឆ្នាំ២០២០ ទិសដៅទេសចរណ៍ដ៏ពេញនិយមកោះកូម៉ូដូ ដែលជាកោះសម្បូរសត្វត្រកួតយក្សរបស់ពិភពលោក នឹងត្រូវបិទទ្វារ ១ឆ្នាំ មិនឱ្យភ្ញៀវទេសចរចូលមកលេងនោះទេ។ ហេតុផលគឺដោយសារពួកគេរកឃើញថា មានការជួញដូរសត្វត្រកួតយក្ស (Komodo Dragon) ចំនួន ៤១ក្បាល នៅលើបណ្តាញសង្គម Facebook ក្នុងតម្លៃ ៣៥,០០០ ដុល្លារអាមេរិក/ក្បាល។

សត្វត្រកួតយក្ស គឺជាពូជសត្វល្មូនដែលធំជាងគេបំផុតនៅលើពិភពលោក និងជាសត្វមានពិស សូម្បីតែខាំតែបន្តិចក៏អាចមានគ្រោះថ្នាក់បានដែរ។ ប្រភេទសត្វនេះក៏ត្រូវបានចាត់ជាប្រភេទ «ងាយរងគ្រោះ» ក្រោមបញ្ជីក្រហម ICUN ។ រឿងដែលគួរឱ្យចាប់អារម្មណ៍មួយទៀតអំពីសត្វត្រកួតយក្សកូម៉ូដូគឺថា ឈាមរបស់ពួកវាផ្ទុកនូវ antimicrobial peptides ជាច្រើន ដែលមិនត្រឹមតែជួយពួកគេប្រយុទ្ធប្រឆាំងនឹងការឆ្លងទេ ប៉ុន្តែធ្វើឱ្យពពួកសត្វល្មូននេះមានភាពស៊ាំទៅនឹងពិសនៃពូជសត្វល្មូនយក្សផ្សេងទៀត។ អ្នកជំនាញមួយចំនួនជឿថា ឈាមរបស់ពួកវាក៏អាចត្រូវបានប្រើក្នុងការបង្កើតថ្នាំអង់ទីប៊ីយោទិចដែរ ប៉ុន្តែជំនឿនេះនៅតែត្រូវការការសិក្សាបន្ថែមទៀត៕

អត្ថបទ៖ លីដា
ប្រភព៖ worldofbuzz