សត្វមមាចត្នោត រាតត្បាតស្រូវកសិករអស់ជាង ១០០ហិកតា នៅស្រុកឯកភ្នំ ខេត្តបាត់ដំបង
ខេត្តបាត់ដំបង៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា មន្ទីរកសិកម្មនិងរុក្ខាប្រមាញ់ ខេត្តបាត់ដំបង បានបញ្ជាក់ថា សត្វមមាចត្នោតកំពុងរាតត្បាតស្រូវកសិករភូមិចំនួន៣ ក្នុងឃុំពាមឯក ស្រុកឯកភ្នំ ខេត្តបាត់ដំបង មានភូមិគងទុំ ភូមិករហាល និងភូមិចុងឆ្តោរ (ចំណុចអាងភាស) ប្រមាណ ១១១ហិកតា ដែលក្នុងមួយហិកតាមានការស៊ីជញ្ជក់ស្រូវក្នុងដំណាក់កាលផើមចេញផ្កាចន្លោះពី ១០ទៅ ២៥ម៉ែត្រការ៉េ។
ស្រូវដែលសត្វមមាចត្នោតរាតត្បាតនេះមាន ប្រភេទស្រូវស្រង៉ែ, OM 5451 និងស្រូវសែនក្រអូប។ ផេកមន្ទីរកសិកម្មខេត្ត បានបញ្ជាក់ថា លោកឈឹម វជ្ជរា ប្រធានមន្ទីរ និងមន្ត្រីជំនាញ រួមជាមួយ ថ្នាក់ដឹកនាំការិយាល័យកសិកម្មធនធានធម្មជាតិ និងបរិស្ថានស្រុកឯកភ្នំ បានចុះធ្វើការអន្តរាគមន៌ នាព្រឹកថ្ងៃទី ១៦ ខែសីហា ឆ្នាំ ២០២៤នេះ ដោយបានធ្វើការណែនាំបច្ចេកទេសលើការគ្រប់គ្រងមមាចត្នោត តាមរយៈការបញ្ចូលទឹកក្នុងស្រែ និងប្រាស់ប្រាស់វិធានការទប់ស្កាត កុំអោយរីករាលដាល ដោយប្រើប្រាស់វិធានការគីមី បាញ់ទប់ស្កាត់ ផ្នែកស្រែនៅខាងលើ នូវប្រភេទថ្នាំកម្ចាត់មមាចត្នោត ។
ទោះបីយ៉ាងណាមន្ទីរកសិកម្មបញ្ជាក់ថាគិតត្រឹមថ្ងៃទី១៦ ខែសីហានេះ ស្ថានភាពនៃការរាតត្បាតដោយមមាចត្នោតនៅតំបន់នេះ ត្រូវបានគ្រប់គ្រង មានការថយចុះ។
ចំណែកផលប៉ះពាល់ ដោយសារមមាចត្នោត ខាងលើនេះ មន្ទីរកសិកម្ម នៅបន្តសហការ ជាមួយមន្ត្រីជំនាញ ការិយាល័យកសិកម្មធនធានធម្មជាតិ និងបរិស្ថានស្រុកទាំង២ រួមជាមួយ អាជ្ញាធរមូលដ្ឋាន ដើម្បីធ្វើការតាមដានឃ្លាំមើល នូវវត្តមានសមាសភាពចង្រៃ(មមាចត្នោត) ជាប្រចាំ រហូតដល់ការគ្រប់គ្រងបានទាំងស្រុង និងបន្តធ្វើការផ្សព្វផ្សាយ ផ្តល់សេវា បច្ចេកទេស គ្រប់គ្រង លើសមាសភាពចង្រៃលើ ដំណាំស្រូវ ដំណាំកសិកម្មដល់បងប្អូនកសិករអោយកាន់តែទូលំទូលាយបន្ថែមទៀត។
មានឯកសារមន្ទីរកសិកម្ម បានបញ្ជាក់ថា ដើម្បីការពារពីសត្វមមាចត្នោតកសិករ មិនត្រូវធ្វើស្រែពេញមួយឆ្នាំនោះទេ ទុកចន្លោះពីរដូវមួយ ទៅរដូវមួយឲ្យឃ្លាតគ្នាយ៉ាងតិចពី ២០ ទៅ ៣០ថ្ងៃ, ត្រូវប្រើប្រាស់ពូជដែលធន់ជំងឺ សត្វមមាចត្នោត, កុំព្រោះស្រូវ ឬសន្ទូងក្រាស់ពេក, រក្សាទឹកក្នុងស្រែឲ្យបានសមស្រប, ប្រើប្រាស់ជីឲ្យបានត្រឹមត្រូវចៀសវាងប្រើជីអាសូតលើសកម្រិតជាដើម។
ចំពោះវិធានការកម្ចាត់មមាចត្នោត ចំពោះស្រែដែលមានទឹក ត្រូវបង្កើនកម្រិតទឹករួចប្រើស្បៃមុងអូសយកសត្វមមាចតាមដែលអាចធ្វើបាន ឬប្រើដីខ្សាច់លាយជាមួយប្រេងម៉ាស៊ូត ៣ ទៅ ៤លីត្រក្នុងមួយហិកតារួចបាចចូលក្នុងស្រែឲ្យបានសប់ល្អ បន្ទាប់មកយកមេឃឈើគោះទម្លាក់ទឹក ចំពោះស្រែគ្មានទឹកត្រូវប្រើប្រេងម៉ាស៊ូត ៣ ទៅ ៤លីត្រលាយជាមួយអង្កាម ឬកន្ទក់លាយឲ្យសប់រួចបាចចូលទៅក្នុងស្រែដើម្បីចេញសត្វមមាច, ព្រលែងទាចូលក្នុងស្រែ ជម្រើសចុងក្រោយត្រូវប្រើប្រាស់ថ្នាំកសិកម្ម៕
ប្រភព៖ ក្រសួងព័ត៌មាន