ឆេះឡធ្វើនំ បង្កជាអគ្គិភ័យឆាបឆេះឃ្លាំងផលិតនំមួយកន្លែង ស្ថិតនៅសង្កាត់ឃ្មួញ ខណ្ឌសែនសុខ

រាជធានីភ្នំពេញ៖ យោងតាមការចុះផ្សាយរបស់ ស្នងការដ្ឋាននគរបាលរាជធានីភ្នំពេញ បានឱ្យដឹងថា នៅថ្ងៃ២១ ខែសីហា ឆ្នាំ២០២៤ វេលាម៉ោង ០៣ និង ១៥នាទីទាបភ្លឺ មានករណីអគ្គិភ័យមួយកើតឡើងនៅចំណុចឃ្លាំងផលិតនំ ស្ថិតនៅភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។

អគ្គិភ័យនេះបណ្តាលមកពីមូលហេតុឆេះឡធ្វើនំ បណ្តាលឱ្យឆាបឆេះសំណង់ថ្ម ទំហំ ៥០ x ១០០ ម៉ែត្រ។ ខូចខាតសម្ភារួមមាន៖ ខូចឡដុតនំចំនួន៤ ឆេះឡចំហុយនំចំនួន ២ នឹងសម្ភារមួយចំនួនពុំមានឆេះដល់ផ្ទះអ្នកក្បែរជិតខាងឡើយ។ អគ្គិភ័យនេះមិនបណ្តាលឱ្យមានមនុស្សរបួសឡើយ។

អគ្គិភ័យនេះពន្លត់បានទាំងស្រុង នៅវេលាម៉ោង ០៥ និង១៥នាទី ទៀបភ្លឺ នាថ្ងៃខែឆ្នាំដដែល ដោយប្រើប្រាស់រថយន្តការិយាល័យបង្កា និងពន្លត់អគ្គិភ័យចំនួន ០៦គ្រឿង ប្រើប្រាស់ទឹកអស់ចំនួន៦ឡាន ស្មើនឹង ២៤ម៉ែត្រគូប៕

ប្រភព៖ ស្នងការដ្ឋាននគរបាលរាជធានីភ្នំពេញ