ខេ​ត្តស្ទឹង​ត្រែង៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ក្នុងសប្ដាហ៍នេះ ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបា​លសមាគម​សិល្បករ​ខ្មែរ និងលោកជំទាវ ឡុង ភារម្យ រដ្ឋលេខាធិការក្រសួងទេសចរណ៍ និងជាសមាជិកក្រុមប្រឹក្សាភិបាលសមាគម បាន​ដឹកនាំក្រុមការងារ និងសិល្បករសិល្បការិនី មួយចំនួន ដើម្បីធ្វើទស្សនកិច្ច នៅបណ្ដាខេត្ត​ទាំង៤ជាប់ព្រំប្រទល់កម្ពុជា-វៀតណាម-ឡាវ រួមមាន ខេត្តក្រចេះ ស្ទឹងត្រែង រតនគិរី មណ្ឌលគិរី ដើម្បីស្វែងយល់ពីស្ថានភាព​ពិត​នៃជីវភាព​រស់នៅរបស់ប្រជាពលរដ្ឋ និង​ការវិវត្តនានារបស់រាជរដ្ឋា​ភិបាល ក៏ដូចជាស្វែងយល់ពីវប្បធម៌រស់នៅរបស់ប្រជាជន ព្រមទាំងសក្ដានុពលទេស​ចរណ៍នៃបណ្ដារខេត្ត​ទាំងនោះផងដែរ។

ក្រុមការងារ និងសិល្បករ សិល្បការនីចំនួនជាង៥០រូបនៅខេ​ត្តស្ទឹង​ត្រែង បានធ្វើទស្សនកិច្ចនៅតាម​បង្គោល​ព្រំដែនរវាង​កម្ពុជា-ឡាវ និងតំបន់អភិវឌ្ឍផ្សេងៗជាច្រើន ជាពិសេសទំនប់វារីអគ្គិសនីសេសាន​ក្រោម២។

សិល្បករ សិល្បការិនី ដែលបានចូលរួមក្នុងដំណើរទស្សនកិច្ចបាន​បង្ហាញអារម្មណ៍រីករាយដែលបានចុះទៅដល់បន្ទាត់​ព្រំដែន​ដោយ​ផ្ទាល់ស្វែងយល់នូវការពិតជាក់ស្ដែង។ ជាពិសេស ពួកគាត់បាន​បង្ហាញនូវមោទនភាព ដោយមិននឹងស្មានថា តំបន់ព្រំដែន​មានការ​អភិវឌ្ឍ​ស្ទើរមិនគួរឱ្យជឿទាំងហេដ្ឋារចនាសម្ព័ន្ធ និងជីវភាពការរស់​នៅរបស់ប្រជាពលរដ្ឋ។

ម្យ៉ាងទៀត ពួកគេក៏មានការភ្ញាក់ផ្អើល និងកោតសរសើរចំពោះ​ការវិនិយោគលើទំនប់វារីអគ្គិសនីសេសានក្រោម២ ដែលមានប្រវែង ៦,៥ គីឡូម៉ែត វែងបំផុតក្នុងទ្វីបអាស៊ី ដែលជាការវិនិយោគរួមគ្នា​រវាងក្រុមហ៊ុន Royal Group របស់លោកអ្នកឧកញ៉ា គិត ម៉េង ជាមួយក្រុម Hydrolancang International Energy របស់ប្រទេសចិនក្រោមទម្រង់« សាងសង់រួច-ដំណើរ​ការ- និងផ្ទេរមករាជ​រដ្ឋាភិបាលឬ BOT សម្រាប់រយៈពេលសម្បទាន៤៥ឆ្នាំ។

ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងប្រធានក្រុមប្រឹក្សាភិបាលសមាគមសិល្បករខ្មែរយល់​ឃើញ​ថា ការដឹកនាំប្រកបដោយចក្ខុវិស័យរបស់រាជរដ្ឋាភិបាលកម្ពុជា ធ្វើឱ្យប្រជាពលរដ្ឋមានការជឿជាក់។ ជាពិសេស​ប្រជាពលរដ្ឋរស់​នៅតាមបណ្ដាខេត្តជាប់ព្រំដែនប្រទេសជិតខាង។ តាមព្រំ​ប្រទល់ជាមួយប្រទេសជិតខាង សុទ្ធសឹងតែមានការអភិវឌ្ឍ មានហេដ្ឋា​រចនាសម្ព័ន្ធ និងមានគម្រោងវិនិយោគធំៗ។ឯកឧត្តមមើលឃើញថា រាជរដ្ឋាភិបាលបានខិតខំកសាងព្រំដែនសន្តិភាព មិត្តភាព កិច្ចសហប្រតិបត្តិការ ដើម្បីលើកកម្ពស់សេដ្ឋកិច្ចជាតិ៕

ប្រភព៖ ក្រសួងព័ត៌មាន