ខេត្តកំពង់ចាម៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ឯកឧត្តម​សន្តិបណ្ឌិត​ នេត​ សាវឿន​ ឧបនាយករដ្ឋមន្ត្រី​ ប្រធានក្រុម ការងាររាជរដ្ឋាភិបាលចុះមូលដ្ឋានខេត្តកំពង់ចាម​ បានចាត់ ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ហែម សុវត្តិ ប្រធាន ក្រុមការងាររាជរដ្ឋាភិបាល​ចុះមូលដ្ឋាន​ឃុំកោះសូទិន សហការជាមួយ ក្រុមគ្រូពេទ្យស្ម័គ្រចិត្ដសហភាពសហព័ន្ធយុវជនកម្ពុជា(ស.ស.យ.ក) ដឹកនាំដោយឯកឧត្តមបណ្ឌិត ហេង សុខគង់ រដ្ឋលេខាធិការក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធាន ក្រុមប្រឹក្សាភិបាល​សម្ព័ន្ធ​គ្រូពេទ្យ ស.ស.យ.ក​ ចុះពិនិត្យ ព្យាបាល និងចែកឱសថជូនប្រជាពលរដ្ឋក្នុងឃុំកោះសូទិន ប្រមាណ ជាង៤.០០០នាក់ ស្ថិតនៅក្នុងបរិវេណវិទ្យាល័យ កោះសូទិន ស្រុកកោះសូទិន ខេត្តកំពង់ចាម។

ក្នុងសកម្មភាពនៅថ្ងៃទី៧ ខែកញ្ញា ឆ្នាំ២០២៤នេះ ឯកឧត្ដម​ អ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ ការចុះពិនិត្យ និង​ព្យាបាល​ជំងឺ​ នាពេលនេះ គឺដើម្បីលើកម្ពស់កម្រិតសុខភាព ជូនបងប្អូនប្រជា​ពលរដ្ឋ ដែលជាផ្នែកមួយបានចូលរួមចំណែកកាត់​បន្ថយ​ភាពក្រីក្រ ពីព្រោះបើយើងមានជំងឺតម្កាត់ យើងត្រូវទៅកាន់ពេទ្យឯកជន និងត្រូវការចំណាយបង់ប្រាក់ផ្ទាល់ខ្លួន ប៉ុន្តែពិធី​នៅថ្ងៃនេះ គឺពុំមាន​ការបង់ថ្លៃសេវាព្យាបាលឡើយ។

ឯកឧត្តមអភិបាលខេត្ត បានគូសរំលេចទៀតថា ស្របពេលប្រទេសជាតិ​មានសុខសន្តិភាព និងការអភិវឌ្ឍរីកចម្រើន, ប្រមុខរាជ​រដ្ឋាភិបាល​កម្ពុជា បានគិតគូ និងលើកកម្ពស់កម្រិតជីវភាពរបស់ប្រជា​ពលរដ្ឋ​គ្រប់ទីកន្លែង ។ទន្ទឹមនឹងការកសាងសមិទ្ធផល នៃផ្នែក​ហេដ្ឋារចនា​សម្ព័ន្ធ រាជរដ្ឋាភិបាលកម្ពុជា ក៏បានយកចិត្តទុកដាក់ខ្ពស់ផងដែរ អំពីសុខភាព របស់ប្រជាពលរដ្ឋទូទៅ ពីព្រោះ ចាំបាច់​ណាស់​មនុស្សម្នាក់ៗ ត្រូវតែមានសុខភាពល្អបរិបូណ៌ ទាំងផ្លូវកាយ និងផ្លូវចិត្ត ៕

ប្រភព៖ ក្រសួងព័ត៌មាន