អភិបាលខេត្តកែប ព្រលែងសត្វល្មិចចំនួន៣ក្បាល ចូលសមុទ្រវិញ បន្ទាប់ពីទទួលបានពីអ្នកនេសាទ
ខេត្តកែប៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ដោយមានការយកចិត្តទុកដាក់ពីរដ្ឋបាលខេត្តកែប ក្រោមការដឹកនាំរបស់ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប និងមន្រ្តីនៃមន្ទីរជំនាញ អាជ្ញាធរខេត្តកែប បានយកចិត្តទុកដាក់ ការពារ ថែរក្សា និងបង្កើតអោយមានការគ្រប់គ្រងតំបន់អភិរក្សជលផលនៅក្នុងសមុទ្រនិងតាមបណ្តាកោះនានាជាបន្តបន្ទាប់។ តួយ៉ាង នាថ្ងៃទី១៣ ខែកញ្ញា ឆ្នាំ២០២៤នេះ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានអញ្ញើញចុះទៅកោះពោធិ៍ ដើម្បីលែងសត្វល្មិច ឬហៅអណ្តើកសមុទ្រ ចំនួន៣ក្បាល ចូលទៅសមុទ្រវិញ ស្ថិតភូមិកែប សង្កាត់កែប ក្រុងកែប ខេត្តកែប។
បន្ថែមពីនោះ ដោយមានកិច្ចសហការជាមួយគណៈកម្មាធិការជាតិសន្តិសុខលម្ហសមុទ្រ បន្ទាប់ពីលែងអណ្ដើកសមុទ្រទម្ងន់សរុបជាង១០០គីឡូក្រាម ឯកឧត្តមក៏បានបន្តសួរសុខទុក្ខកងកម្លាំងប្រចាំការ ការពារអធិបតេយ្យភាពជាតិខ្មែរតាមបណ្ដាកោះ ក្នុងភូមិសាស្រ្តខេត្តកែបផងដែរ។
ឯកឧត្តមបណ្ឌិត សោម ពិសិដ្ឋ អភិបាលខេត្តកែប មានប្រសាសន៍ថា ការលែងសត្វល្មិចនេះ ជាការបញ្ជាក់ពីការចូលរួមរវាងអ្នកនេសាទ និងមន្ត្រីជំនាញ ក្នុងការរួមសាមគ្គីគ្នាដើម្បីថែរក្សាជីវចម្រុះដ៏កម្រក្នុងសមុទ្រខេត្តកែបអោយបានគង់វង្ស ។
ក្នុងនោះ ឯកឧត្តមបណ្ឌិត សោម ពិសិដ្ឋ បានអំពាវនាវអោយប្រជាពលរដ្ឋទាំងអស់ ជាពិសេសប្រជាជានេសាទ ត្រូវបន្តចូលរួមថែរក្សាសត្វសមុទ្រ ពិសេសប្រភេទសត្វកម្រ ដូចជាត្រីដូហ្វីន ជ្រូកទឹក និងសត្វល្មិចនេះជាដើម អោយបានគង្សវង់ ក្រៅពីនេះត្រូវបង្កើនការការពារ អភិរក្ស ដោយប្រើប្រាស់ធនធានជលផលសមុទ្រប្រកបដោយនិរន្តរភាព ស្របតាមគោលនយោបាយចក្ខុវិស័យជលផលជាតិ និងរួមចំណែកលើកកម្ពស់ជីវភាពរស់នៅរបស់ពលរដ្ឋអោយកាន់តែរីកចម្រើន។
សូមបញ្ជាក់ថា កន្លងមកមន្ទីរពាក់ព័ន្ធ បានធ្វើការណែនាំ អប់រំ ផ្សព្វផ្សាយ ដល់ប្រជានេសាទ អោយយល់ដឹងអំពីប្រយោជន៍ ក្នុងការថែរក្សា គាំពារ សត្វសមុទ្រ ដែលជាសត្វកម្រ ដូចជាប្រភេទសត្វល្មិចនេះជាដើម ដើម្បីបង្កើនការយល់ដឹងពីគុណប្រយោជន៍នៃសត្វសមុទ្រកម្រទាំងនេះ៕
ប្រភព៖ ក្រសួងព័ត៌មាន