រាជធានីភ្នំពេញ៖ យោងតាមគណនីហ្វេសប៊ុកផ្ទាល់របស់ វត្តបទុមវតីរាជវរារាម បានឱ្យដឹងថា នៅថ្ងៃពុធ ៨រោច ខែភទ្របទ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី២៥ ខែកញ្ញា ឆ្នាំ២០២៤ សម្តេចព្រះពុទ្ធជ័យមុនីបណ្ឌិត ឃឹម សន ព្រះមេគណរាជធានីភ្នំពេញ និងជាព្រះគ្រូសូធ្យស្តាំវត្តបទុមវតីរាជវរារាម បានចាត់ព្រះសង្ឃយកបបរ (យាគូ) ចែកជូនដល់ បុគ្គល ប្រជាពលរដ្ឋប្រុសស្រី ដែលយកកូន (កុមារ) មកសម្រាកព្យាបាលជំងឺ នៅមន្ទីរពេទ្យគន្ធបុប្ផាទី២ ក្នុងវេនបិណ្ឌទី៨ វត្តបទុមវតី​ សង្កាត់ចតុមុខ ខណ្ឌដូនពេញ​ រាជធានីភ្នំពេញ។

ដែលនេះជាសទ្ធាជ្រះថ្លាពី ឯកឧត្តមបណ្ឌិត ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា ព្រមទាំង កូនចៅនៃគណៈកម្មការទ្រទ្រង់បណ្ណាល័យអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង ទាំងអស់ ព្រមទាំងញាតិព្រះធម៌។

ព្រះគ្រូសូធ្យស្តាំវត្តបទុមវតី សូមជូនពរកូនៗដែលកំពុងសម្រាកព្យាបាល សូមឆាប់បានធូសះស្បើយពីរោគាទាំងឡាយទាំងពួង សមប្រកបដោយពុទ្ធពរ៤ ប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕

ប្រភព៖ វត្តបទុមវតីរាជវរារាម