ក្រសួងសាធារណការ ដោះលែងរថយន្តដែលឃាត់ទុករយៈពេល ១ឆ្នាំ ចំនួន ១០៨គ្រឿង និងបន្តរឹតបន្តឹងការអនុវត្តច្បាប់ លើយានយន្តដឹកជញ្ជូនលើសទម្ងន់កម្រិតកំណត់

(រាជធានីភ្នំពេញ)៖ យោងតាមការចុះផ្សាយរបស់ ក្រសួងសាធារណការ និងដឹកជញ្ជូន នៅថ្ងៃទី ១៩ ខែមីនា ឆ្នាំ ២០២៥ នេះ បានឱ្យដឹងថា ក្រសួងសាធារណការ និងដឹកជញ្ជូន ដោះលែងរថយន្តដែលឃាត់ទុករយៈពេល ១ឆ្នាំ ចំនួន ១០៨គ្រឿង និងបន្តរឹតបន្តឹងការអនុវត្តច្បាប់ លើយានយន្តដឹកជញ្ជូនលើសទម្ងន់កម្រិតកំណត់។

នៅក្នុងសេចក្ដីជូនដំណឹងរបស់ ក្រសួងសាធារណការ និងដឹកជញ្ជូន បានឱ្យដឹងថា កាលពីថ្ងៃទី ២១ ខែកុម្ភៈ ឆ្នាំ ២០២៥ នៅទីស្តីការគណៈ រដ្ឋមន្ត្រី ស្តីពីករណីសំណើសុំអនុសាសន៍ណែនាំដ៏ខ្ពង់ខ្ពស់ចំពោះការដោះលែងរថយន្តឃាត់ទុករយៈពេល ១ឆ្នាំ ចំនួន ១០៨គ្រឿង ដែលបានដឹកលើសទម្ងន់កម្រិតកំណត់ គណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ សូមអញ្ជើញ ម្ចាស់ក្រុមហ៊ុន និងម្ចាស់រថយន្តទាំងអស់ដែលមានរថយន្ត ត្រូវបានឃាត់ទុកនាពេលកន្លងមក ដោយមន្ត្រីមានសមត្ថកិច្ចប្រចាំស្ថានីយជញ្ជីងអចល័ត និងក្រុមការងារ ជញ្ជីងចល័តនៃក្រសួងសាធារណការ និងដឹកជញ្ជូន ហើយបានបង់ប្រាក់ពិន័យរួចរាល់ គិតត្រឹមថ្ងៃទី ៣ ខែមីនា ឆ្នាំ ២០២៥ មកចូលរួមដោះស្រាយដូចខាងក្រោម៖

១- ម្ចាស់ក្រុមហ៊ុន និងម្ចាស់រថយន្តដឹកជញ្ជូនលើសទម្ងន់កម្រិតកំណត់ ដែលមានរថយន្តត្រូវ បានឃាត់ទុក និងបានបង់ប្រាក់ពិន័យរួចរាល់ អាចមកទទួលរថយន្តនៅតាមទីតាំងរក្សាទុក ចាប់ពីថ្ងៃជូន ដំណឹងនេះរហូតដល់ថ្ងៃទី ៤ ខែមេសា ឆ្នាំ ២០២៥ ដោយតម្រូវឱ្យមានការធ្វើកិច្ចសន្យាលែងប្រព្រឹត្តបទល្មើស ដឹកជញ្ជូនលើសទម្ងន់កម្រិតកំណត់បន្តទៀត។

២- ក្រសួងសាធារណការ និងដឹកជញ្ជូន នឹងបន្តអនុវត្តច្បាប់យ៉ាងតឹងរ៉ឹង ចាប់ពីថ្ងៃទី១៦ ខែមេសា ឆ្នាំ២០២៥ តទៅ ដោយបន្ថែមវិធានការចំពោះយានយន្តល្មើស ដែលដឹកលើសទម្ងន់កម្រិតកំណត់ ដោយ ត្រូវពិន័យទាំងការផ្ទុកលើសទម្ងន់សរុប និងការផ្ទុកលើសទម្ងន់នៃភ្លៅនីមួយៗទាំងពីរករណីព្រមគ្នា ស្របតាម មាត្រា៦០នៃច្បាប់ស្តីពីផ្លូវថ្នល់។

ក្រសួងសាធារណការ និងដឹកជញ្ជូន សង្ឃឹមយ៉ាងមុតមាំថា សមាគមដឹកជញ្ជូនទំនិញផ្លូវគោក កម្ពុជា សមាគមភ្នាក់ងារបញ្ជូនទំនិញកម្ពុជា សមាគមភស្តុភារកម្មកម្ពុជា ម្ចាស់ក្រុមហ៊ុនដឹកជញ្ជូន ឬម្ចាស់ រថយន្តដឹកជញ្ជូនធុនធ្ងន់គ្រប់ប្រភេទ នឹងចូលរួមអនុវត្តតាមខ្លឹមសារនៃសេចក្តីជូនដំណឹងនេះឱ្យមានប្រសិទ្ធភាព ត្រឹមត្រូវ ម៉ឺងម៉ាត់ និងប្រកបដោយស្មារតីទទួលខុសត្រូវខ្ព យស្មារតីទទួលខុសត្រូវខ្ពស់៕

ប្រភព៖ ក្រសួងសាធារណការ និងដឹកជញ្ជូន