មន្ត្រីជំនាញ ចុះឃាត់ចាប់រថយន្តមួយគ្រឿងដឹកសត្វមាន់ចំនួន ៦៦០ក្បាល ចេញពីប្រទេសវៀតណាមឆ្ពោះមកលក់ចែកចាយនៅភ្នំពេញ ដោយគ្មានលិខិតអនុញ្ញាត

(រាជធានីភ្នំពេញ)៖ តាមការការបង្ហោះនៅលើទំព័រហ្វេសប៊ុករបស់ លោក ហ៊ុន សារ៉ាត់ អនុប្រធានអគ្គនាយកដ្ឋានសុខភាពសត្វ និងផលិតកម្មសត្វ នៅថ្ងៃទី ៣ ខែមេសា ឆ្នាំ ២០២៥ នេះ បានឱ្យដឹងថា ក្រុមអន្តរាគមន៍បង្ក្រាបបទល្មើសចលនាសត្វ និងផលិតផលសត្វ ចុះចាប់រថយន្តមួយគ្រឿងដឹកសត្វមាន់រស់ចំនួន ៦៦០ក្បាល ចេញពីប្រទេសវៀតណាម ដោយគ្មានលិខិតអនុញ្ញាត។

នៅក្នុងការបង្ហោះរបស់ លោក ហ៊ុន សារ៉ាត់ អនុប្រធានអគ្គនាយកដ្ឋានសុខភាពសត្វ និងផលិតកម្មសត្វ បានឱ្យដឹងបន្ថែមថា នៅវេលាម៉ោង ០៦ និង០៥នាទីព្រឹក នាថ្ងៃទី ០៣ ខែមេសា ឆ្នាំ ២០២៥ ក្រុមអន្តរាគមន៍បង្ក្រាបបទល្មើសចចលនាសត្វនៃអគ្គដ្ឋានសុខភាពសត្វ និងផលិតកម្មសត្វ បានចុះឃាត់ចាប់រថយន្តមួយគ្រឿង ម៉ាក SSANGYONG ISTANA ដឹកសត្វមាន់រស់ចំនួន ៥៥ទ្រុង ស្មើនឹង ៦៦០ក្បាល លើផ្លូវចំការដូង ជិតភ្លើងស្តុបបាគូ សង្កាត់បាគូ ខណ្ឌដង្កោ រាជធានីភ្នំពេញ។

ចំពោះរថយន្តខាងលើ បានដឹកសត្វមាន់ចេញពីប្រទេសវៀតណាម តាមច្រករបៀង ស្រុកគិរីវង់ ខេត្តតាកែវ ឆ្ពោះមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់។ ក្រុមការងារបាននាំយកវត្ថុតាង និងបទល្មើសយ៉ាងនេះទៅរក្សាទុកនៅចត្តាឡីស័ក របស់អគ្គដ្ឋានសុខភាពសត្វនិងផលិតកម្មសត្វ ដើម្បីចាត់ការទៅតាមនីតិវិធី៕

ប្រភព៖ Sarat Hun