Range Rover SVO Astronaut Edition ពិតជាស្រស់ស្អាតប្លែកភ្នែក ប៉ុន្តែមនុស្សធម្មតាមិនអាចទិញវាបាននោះទេ

ក្រុមហ៊ុន Land Rover បានបញ្ចេញនូវរថយន្ត Range Rover SVO Astronaut Edition របស់ខ្លួនថ្មីមួយ ដើម្បីបំពេញតម្រូវការដល់អតិថិជនដែលជាអនាគតអវកាសចរ។ ជាការពិតណាស់! ទាល់តែអ្នកជាអវកាសចរ ឬធ្លាប់ទៅលើទីអវកាស ទើបអាចទិញម៉ូដែលនេះបាន។ វាជាគម្រោងរបស់ក្រុមហ៊ុន Land Rover ដើម្បីលក់ផ្តាច់មុខនូវម៉ូដែលមួយនេះ ទៅឱ្យនរណាម្នាក់ដែលចុះឈ្មោះជាមួយក្រុមហ៊ុនអវកាសចរ Virgin Galactic ។ ម៉ូដែលនេះបំពាក់ដោយមាស៊ីន ២ប្រភេទ ដោយអតិថិជនអាចជាវជាប្រភេទ Plug-in hybrid ទំហំចំណុះ 2.0លីត្រ ឬ supercharged V8 ក៏បាន។

Astronaut Edition មួយនេះមានធាតុផ្សំក្នុងការរចនាទាំងផ្នែកខាងក្នុង និងក្រៅ (exterior/interior) ដែលជាការគោរពដល់អនាគតអវកាសចររបស់ក្រុមហ៊ុន Virgin Galactic ។ យ៉ាងណាមិញអ្នកចូលរួមកម្មវិធី «អនាគតអវកាសចរ» មើលទៅហាក់ដូចជាក្រុមមនុស្ស ដែលគេជួលឱ្យមកបម្រើការដើម្បីហោះហើរទៅលើអវកាសជាមួយនឹង Virgin Galactic។

ហើយយោងតាមសារព័ត៌មាន Reuters បានឱ្យដឹងថា គិតត្រឹមដំណាច់ ឆ្នាំ២០១៨ មនុស្សជិត ៧០០នាក់ (រួមទាំង Leonardo DiCaprio និង Justin Bieber) ក៏បានចុះឈ្មោះការហោះហើរនេះដែរ។ របាយការណ៍ក៏បានបន្ថែមឱ្យដឹងថា ការហោះហើររយៈពេល ៩០នាទី ម្តងមានតម្លៃរហូតដល់ ២៥០,០០០ដុល្លារ ឯណោះ។

អត្ថបទ៖ លីដា
ប្រភព៖ autocar