ឯកឧត្តម ហ៊ុន ម៉ានី៖ ព្រឹត្តិការណ៍អង្គរសង្ក្រាន្ត ឆ្នាំ ២០២៥ បានបិទបញ្ចប់ដោយជោគជ័យ និងពោរពេញដោយស្នាមញញឹមពីប្រជាពលរដ្ឋគ្រប់ស្រទាប់

(រាជធានីភ្នំពេញ)៖ នៅថ្ងៃទី ១៨ ខែមេសា ឆ្នាំ ២០២៥ នេះ តាមការចុះផ្សាយរបស់ ក្រសួងព័ត៌មាន បានឱ្យដឹងថា ព្រឹត្តិការណ៍អង្គរសង្ក្រាន្ត ឆ្នាំ ២០២៥ បានបិទបញ្ចប់ដោយជោគជ័យ និងពោរពេញដោយស្នាមញញឹមពីប្រជាពលរដ្ឋគ្រប់ស្រទាប់។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) និងជាប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ត ឆ្នាំ ២០២៥ បានប្រកាសពីការបិទបញ្ចប់ព្រឹត្តិការណ៍ដ៏ធំនេះដោយជោគជ័យ និងពោរពេញដោយស្នាមញញឹមរីករាយពីប្រជាពលរដ្ឋគ្រប់ស្រទាប់។

តាមរយៈបណ្ដាញសង្គមហ្វេសប៊ុករបស់ ឯកឧត្តម ហ៊ុន ម៉ានី នៅថ្ងៃទី១៨ ខែមេសា ឆ្នាំ២០២៥ បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំក្រុមការងារ យុវជនស្ម័គ្រចិត្ត និងសមាជិកនៃចង្កោមការងារទាំង ៩ នៃគណៈកម្មការរៀបចំ។ ឯកឧត្តមបានកោតសរសើរចំពោះការលះបង់កម្លាំងកាយ ចិត្ត និងពេលវេលា ដែលបានរួមចំណែកធ្វើឱ្យព្រឹត្តិការណ៍អង្គរសង្ក្រាន្តឆ្នាំនេះទទួលបានលទ្ធផលដ៏គួរជាទីមោទនៈ។

ជាពិសេស ឯកឧត្តមបានថ្លែងអំណរគុណដល់៖

-ចង្កោមទី១: ដឹកនាំដោយឯកឧត្តមផ្ទាល់ ផ្តោតលើរដ្ឋបាល ហិរញ្ញវត្ថុ ឧបត្ថមគាំទ្រ ផ្សព្វផ្សាយ ទំនាក់ទំនងសាធារណៈ រូបភាព វីដេអូ និងពិធីសាសនា។

-ចង្កោមទី២: ដឹកនាំដោយឯកឧត្តម សាយ សំអាល់ ទទួលបន្ទុកកម្មវិធីតន្ត្រីសួស្តីឆ្នាំថ្មី ការផ្សាយផ្ទាល់ ការសម្របសម្រួលតារា សិល្បករបុរាណ កម្មវិធីសួនមុនីហទ័យ និងការប្រណាំងរទេះគោ ក្របី។

-ចង្កោមទី៣: ដឹកនាំដោយឯកឧត្តម ស សុខា ទទួលខុសត្រូវលើកម្មវិធីយុទ្ធគុនចម្រុះខ្មែរបុរាណ របាំបុរាណ ប្រពៃណី ប្រជាប្រិយ និងការបណ្តែតគោមបួងសួង។

-ចង្កោមទី៤: ដឹកនាំដោយឯកឧត្តម ទៀ សីហា គ្រប់គ្រងការផ្គត់ផ្គង់ទឹក អនាម័យ បរិស្ថាន សម្របសម្រួលយុវជន និងភេសជ្ជៈ កម្មវិធីសួនញញឹមអង្គរ ល្បែងប្រជាប្រិយ ទាញព្រ័ត្រ លេងទឹក ភូមិត្នោត ភូមិរចនា សួនកុមារ ផ្សារស្ទឹងសៀមរាប និងកម្មវិធីនៅតាមតំបន់ផ្សេងៗ។

-ចង្កោមទី៥: ដឹកនាំដោយឯកឧត្តម កើត រិទ្ធិ ទទួលបន្ទុកក្បួនដង្ហែអង្គរសង្ក្រាន្ត។

-ចង្កោមទី៦: ដឹកនាំដោយឯកឧត្តម គីម រិទ្ធី ទទួលខុសត្រូវលើការដឹកជញ្ជូន ផលិតផល ស.ស.យ.ក. និងកម្មវិធីភូមិខ្ញុំ។

-ចង្កោមទី៧: ដឹកនាំដោយឯកឧត្តម សាយ សំអាល់ លើកិច្ចការសន្តិសុខ សណ្តាប់ធ្នាប់ ចរាចរណ៍ បង្ការអគ្គីភ័យ សង្គ្រោះបឋម និងខ្លឹមសារប្រតិកម្មរហ័ស។

-ចង្កោមទី៨: ដឹកនាំដោយលោកជំទាវ ដាំ ដារីនី ទទួលបន្ទុកពិធីការ ពិធីបើកព្រឹត្តិការណ៍ និងការប្រកួតអុកចត្រង្គ។

-ចង្កោមទី៩: ដឹកនាំដោយឯកឧត្តម សុះ មុះសិន ទទួលខុសត្រូវលើកម្មវិធីពិព័រណ៌ពាណិជ្ជកម្ម។

ឯកឧត្តម ហ៊ុន ម៉ានី បានសង្កត់ធ្ងន់ថា អង្គរសង្ក្រាន្តបានបន្សល់ទុកនូវអនុស្សាវរីយ៍ និងស្នាមញញឹមដែលមិនអាចបំភ្លេចបានសម្រាប់អ្នកចូលរួមទាំងអស់។ ទន្ទឹមនឹងនេះ ឯកឧត្តមបានលើកទឹកចិត្តដល់ក្រុមការងារបន្តបេសកកម្មជួយសង្គម និងការងារស្ម័គ្រចិត្ត ដោយចាត់ទុកការងារនេះជាសាលារៀនដ៏សំខាន់សម្រាប់ការបណ្តុះស្មារតីស្រឡាញ់ជាតិ និងការងារជាប្រយោជន៍រួម៕

ប្រភព៖ ក្រសួងព័ត៌មាន