ក្រុមហ៊ុន Boeing ប្រកាសថា ពួកគេបានបញ្ចប់ការអាប់ឌែត software មកលើម៉ូដែល 737 MAX រួចរាល់ហើយ

ក្រុមហ៊ុន Boeing បានឱ្យដឹងកាលពីថ្ងៃព្រហស្បតិ៍ ទី១៦ ខែឧសភា នេះថា ខ្លួនបានបញ្ចប់ការ update ទៅលើ software របស់ម៉ូដែល 737 MAX រួចហើយ បន្ទាប់ពីមានការធ្លាក់យន្តហោះចំនួន ២ដង ដែលបណ្តាលឱ្យមានការដាក់ចុះចតរាល់ម៉ូដែល 737 MAX ទាំងអស់នៅទូទាំងពិភពលោក។ ការស្នើឡើងឱ្យមានការជួសជុលគឺទាក់ទងជាមួយនឹងប្រព័ន្ធគ្រប់គ្រងជើងហោះហើរ ដែលពួកគេគិតថាវាជាមូលហេតុនៃការធ្លាក់ទាំង ២ នេះ ហើយត្រូវតែទទួលបានការអនុម័តពីនិយតករអាមេរិក និងអន្តរជាតិ មុនពេលដែលយន្តហោះម៉ូដែលនេះអាចត្រឡប់មកដំណើរការវិញ។

នាយកប្រតិបត្តិលោក Dennis Muilenburg បាននិយាយនៅក្នុងសេចក្តីថ្លែងការណ៍មួយថា៖ «ដោយសារភាពមានសុវត្ថិភាពគឺជាអាទិភាពរបស់យើង យើងបានបញ្ចប់ការហោះហើរវិស្វកម្មសាកល្បងទាំងអស់ សម្រាប់ការ update software ហើយកំពុងរៀបចំសម្រាប់ការហោះហើរសម្រេចចុងក្រោយ» «ឧប្បត្តិហេតុអកុសលទាំង ២ បានបង្កើនការប្តេជ្ញាចិត្តរបស់ពួកយើងចំពោះគុណតម្លៃរបស់យើង រួមទាំងសុវត្ថិភាព គុណភាព និងសុចរិតភាព ពីព្រោះយើងដឹងថា ជីវិតជាច្រើនអាស្រ័យលើពួកយើង»។

ការប្រកាសរបស់ក្រុមហ៊ុន Boeing បានធ្វើឱ្យភាគហ៊ុនកើនឡើង ២.៦ភាគរយ ស្មើនឹង ៣៥៤.៤៤ដុល្លារ នៅក្នុងការជួញដូរពេលល្ងាច។ ការផ្អាកការហោះហើររបស់ម៉ូដែល 737 MAX បានកាត់បន្ថយប្រាក់ចំណូលរបស់ក្រុមហ៊ុន Boeing និងបានធ្វើឱ្យទស្សនវិស័យរកប្រាក់ចំណេញរបស់ក្រុមហ៊ុនធ្លាក់ចុះ។ ក្រុមហ៊ុន Boeing បាននិយាយថា ខ្លួនបានហោះហើរ 737 MAX ជាមួយនឹងការ update software ទៅលើប្រព័ន្ធ Maneuvering Characteristics Augmentation រយៈរយៈពេលជាង ៣៦០ម៉ោង ស្មើនឹង ២០៧ ជើងហោះហើរ៕

អត្ថបទ៖ លីដា
ប្រភព៖ channelnewsasia