(ខេត្តសៀមរាប)៖ អាជ្ញាធរជាតិអប្សរា បង្កើតកម្មវិធី «Visit Angkor» សម្រាប់ភ្ញៀវទេសចរណ៍ ងាយស្រួលទទួលបានព័ត៌មានផ្សេងៗពីតំបន់ប្រាសាទ និងចំណុចទាក់ទាញក្នុងប្រាសាទនីមួយៗ។

តាមរយៈសេចក្ដីជូនដំណឹងរបស់ អាជ្ញាធរជាតិអប្សរា នៅព្រឹកថ្ងៃទី ៩ ខែឧសភា ឆ្នាំ ២០២៥ នេះ ពីការដាក់ឱ្យប្រើប្រាស់សាកល្បងកម្មវិធី «Visit Angkor» សម្រាប់លើកស្ទួយវិស័យទេសចរណ៍ក្នុងខេត្ត សៀមរាប និងលើកតម្លៃរមណីយដ្ឋានអង្គរ អាជ្ញាធរជាតិអប្សរា បានបង្កើតនូវកម្មវិធីមួយនេះឡើងមក ដែលភាពងាយស្រួលសម្រាប់អ្នកប្រើប្រាស់ ក៏ដូចជាងាយស្រួលទាញយកកម្មវិធីនេះ មកប្រើប្រាស់បានតាមរយៈ App store ឬ Play store ឬ តាមរយៈ QR code ដែលបានជូនភ្ជាប់។ ចំពោះកម្មវិធីមួយនេះមានមុខងារសំខាន់ៗ ដូចខាងក្រោម៖

១- មុខងារប្រាសាទ៖

-ផ្តល់ព័ត៌មានអំពីប្រវត្តិប្រាសាទ ខ្សែទស្សនា ចំណុចទាក់ទាញក្នុងប្រាសាទនីមួយៗ ផែនទីប្រាសាទ និងសម្បទាទេសចរណ៍នានា ដូចជា បន្ទប់ទឹក ចំណត និង មជ្ឈមណ្ឌលផ្តល់ព័ត៌មាន ជាដើម។ល។

២- មុខងារក្រៅពីប្រាសាទ៖

-ផ្តល់ព័ត៌មានអំពីព្រឹត្តិការណ៍ប្រចាំឆ្នាំ សារមន្ទីរ សហគមន៍ទេសចរណ៍ និងកន្លែង កម្សាន្តល្បីៗ នៅក្នុងខេត្តសៀមរាប។

៣-មុខងារក្រមប្រតិបត្តិ៖

-ផ្តល់ព័ត៌មានអំពីសកម្មភាពដែលគួរចៀសវាង នៅពេលចូលទស្សនារមណីយដ្ឋាន អង្គរ។

ក្រៅពីមុខងារសំខាន់ៗខាងលើ កម្មវិធីក៏នឹងមានជូនដំណឹងជាប្រចាំ អំពីសកម្មភាពការងាររបស់អាជ្ញាធរជាតិ អប្សរា ព្រឹត្តិការណ៍ប្រចាំឆ្នាំ មធ្យោបាយក្នុងការទំនាក់ទំនងទៅកាន់អាជ្ញាធរមានសមត្ថកិច្ចដែលអាចជួយសម្រួល និង ជួយសង្គ្រោះក្នុងករណីភ្ញៀវមានបញ្ហាអំឡុងពេលទស្សនាប្រាសាទក្នុងរមណីយដ្ឋានអង្គរ ព្រមទាំងមានចំណុចចូលរួម ផ្តល់ជាមតិយោបល់ ដែលអាចអនុញ្ញាតឱ្យអ្នកប្រើប្រាស់ ផ្ញើសារជាសម្ងាត់មកកាន់ក្រុមការងារ ក្នុងន័យផ្តល់ការកែលម្អ និងស្ថាបនាលើសកម្មភាពការងាររបស់អាជ្ញាធរជាតិអប្សរា បញ្ហាអនាម័យ និងបរិស្ថានជាដើម។ល។

ប្រភព៖ អាជ្ញាធរជាតិអប្សរា