អគ្គីភ័យដ៏ធំបានឆាបឆេះផ្សារ Chatuchak ឬហៅក្រៅថា JJ ដ៏ល្បីល្បាញរបស់ថៃ បង្កឱ្យមនុស្ស ២នាក់ រងរបួស និងត្របាក់យកហាងទំនិញជាច្រើន

យ៉ាងហោចណាស់មានហាងចំនួន ១០០កន្លែង នៅផ្សារ Chatuchak ដ៏ល្បីនៅទីក្រុងបាងកក (Chatuchak Weekend Market) បានឆេះកាលពីថ្ងៃអាទិត្យ ទី២ ខែមិថុនា ដោយមានមនុស្ស ២នាក់ ត្រូវបានគេរាយការណ៍ថាបានរងរបួស។ នៅក្នុងសេចក្តីថ្លែងការណ៍មួយរបស់នាយកដ្ឋានអគ្គីភ័យ និងជួយសង្គ្រោះ នៅក្រុងបាងកកបាននិយាយថា អគ្គីភ័យបានកើតឡើងនៅហាងមួយនៅតាមច្រកទ្វារលេខ ១ របស់ផ្សារ នៅប្រហែលម៉ោង ៩និង ៣០នាទី យប់។ យ៉ាងណាមិញពួកគេបាននិយាយថា អគ្គីភ័យបានស្ថិតនៅក្រោមការគ្រប់គ្រងនៅម៉ោង ១០ និង ០៨នាទី យប់ដដែល។

យោងតាមគេហទំព័ររបស់ទីផ្សារបានឱ្យដឹងថា ច្រកទ្វារលេខ ១ របស់ផ្សារភាគច្រើនជាតូបលក់សៀវភៅ និង​វត្ថុអនុស្សាវរី​យ៍ ព្រមទាំងហាងលក់ម្ហូបអាហារ និងហាងកាហ្វេផងដែរ។ កាសែតបាងកកប៉ុស្តិ៍ដកស្រង់សម្តីពីអ្នកស្ម័គ្រចិត្តជួយសង្គ្រោះបានរាយការណ៍ថា មានហាងចំនួន ១០០ ត្រូវបានខូចខាត និងមនុស្ស ២នាក់ បានរងរបួស។ មុននេះនាយកដ្ឋានអគ្គីភ័យ និងជួយសង្គ្រោះបានចេញសេចក្តីថ្លែងការណ៍មួយដោយនិយាយថា មូលហេតុនៃអគ្គីភ័យនេះកំពុងស្ថិតនៅក្រោមការស៊ើបអង្កេតនៅឡើយ។

ផ្សារ Chatuchak ត្រូវបានគេហៅក្រៅផងដែរថា ជាផ្សារ JJ និងជាទីផ្សារធំបំផុតនៅក្នុងប្រទេសថៃដោយមានស្តង់លក់ច្រើនជាង ១៥,០០០ កន្លែង។ វាក៏ជារមណីយដ្ឋានទាក់ទាញភ្ញៀវទេសចរដ៏ពេញនិយមបំផុតនៅបាងកក ដោយមានលក់សៀវភៅ សំលៀកបំពាក់ គ្រឿងអលង្ការ ម្ហូបអាហារ គ្រឿងសំអាង វត្ថុបុរាណ និងរុក្ខជាតិ៕

អត្ថបទ៖ លីដា
ប្រភព៖ Channelnewsasia