(ខេត្តសៀមរាប)៖ មន្ទីរសាធារណការ និងដឹកជញ្ជូនខេត្ដសៀមរាប ចេញសេចក្ដីជូនដំណឹងពី ការផ្អាកការធ្វើចរាចរណ៍ចំពោះរថយន្តធុនធំគ្រប់ប្រភេទ លើកំណាត់ផ្លូវជាតិលេខ៦៤ ចន្លោះគីឡូម៉ែត្រ៣០ ដល់គីឡូម៉ែត្រ៣១ ក្នុងភូមិសាស្ត្រស្រុកស្វាយលើ ខេត្តសៀមរាប ជាបណ្តោះអាសន្ន។

តាមរយៈសេចក្ដីជូនដំណឹងរបស់ មន្ទីរសាធារណការ និងដឹកជញ្ជូនខេត្ដសៀមរាប នៅរសៀលថ្ងៃទី ២៩ ខែកញ្ញា ឆ្នាំ ២០២៥ នេះ បានឱ្យដឹងថា បន្ទាប់ពីរងគ្រោះដោយសារជំនន់ទឹកភ្លៀងកាលពីពេលថ្មីៗនេះ បានធ្វើឱ្យផ្លូវជាតិ លេខ៦៤ ចន្លោះគ.ម៣០ ដល់គ.ម៣១ (ចំណុចស្ពានត្នោតតាដេវ) ស្ថិតក្នុងភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប រងការខូចខាត ងាយនឹងបង្កគ្រោះថ្នាក់ជាយថាហេតុដល់អ្នកធ្វើដំណើរ។ ក្នុង ន័យនេះ មន្ទីរសាធារណការ និងដឹកជញ្ជូនខេត្តសៀមរាប សូមធ្វើការផ្អាកការធ្វើចរាចរណ៍ចំពោះរថយន្តធុនធំ គ្រប់ប្រភេទលើកំណាត់ផ្លូវជាតិលេខ ៦៤ ចន្លោះគីឡូម៉ែត្រ៣០ ដល់គីឡូម៉ែត្រ៣១ (ចំណុចស្ពានត្នោតតាដេវ) ជាបណ្តោះអាសន្ន ដើម្បីក្រុមការងារបច្ចេកទេសពិនិត្យជួសជុលឡើងវិញ៕

ប្រភព៖ មន្ទីរសាធារណការ និងដឹកជញ្ជូនខេត្ដសៀមរាប