សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចូលរួមរំលែកទុក្ខ និងចូលបុណ្យសពជនរងគ្រោះ ១៨នាក់ ដែលបានស្លាប់ក្នុងឧបទ្ទវហេតុបាក់រលំអគារនៅខេត្តព្រះសីហនុ
ដើម្បីចូលរួមរំលែកមរណទុក្ខ និងជួយដល់ជីវភាពក្រុមគ្រួសារជនរងគ្រោះចំនួន១៨នាក់ ដែលបានស្លាប់ដោយការបាក់រលំអគារនោះ កាលពីព្រឹកថ្ងៃអាទិត្យ ទី២៣ ខែមិថុនាម្សិលមិញនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យថ្នាក់ដឹកនាំ-មន្ត្រីកាកបាទក្រហមកម្ពុជា ចូលរួមរំលែកទុក្ខដ៏ក្រៀមក្រំ ព្រមទាំងនាំយកគ្រឿងឧបភោគ-បរិភោគ និងថវិកាចំនួន ៥លានរៀល ទៅចូលរួមបុណ្យសពនីមួយៗដែលបានដឹកបញ្ជូនទៅធ្វេីបុណ្យតាមប្រពៃណីនៅតាមស្រុកកំណេីតរៀងៗខ្លួន។ ដោយឡែក សាខាកាកបាទក្រហមកម្ពុជា ខេត្តព្រះសីហនុ ក៏បានចូលបុណ្យសពនីមួយៗថវិកា ៥លានរៀលផងដែរ។
ស្ថិតក្នុងសមានទុក្ខដ៏ក្រៀមក្រំនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការីទាំងអស់នៃកាកបាទក្រហមកម្ពុជា សូមសម្តែងនូងការសោកស្តាយចំពោះសោកនាដកម្មបាក់រលំអគារនៅខេត្តព្រះសីហនុ ដែលជារឿងឈឺចាប់របស់ជាតិយើង ជាពិសេសក្រុមគ្រួសារនៃអ្នកដែលបានបាត់បង់ជីវិតដែលជាភរិយា ឬស្វាមី ឬកូន ឬឪពុកម្តាយ។ល។ សូមឧទ្ទិសបួងសួងដល់ដួងវិញ្ញាណក្ខន្ធជនរងគ្រោះទាំងអស់ បានទៅកាន់ទីសុគតិភពកុំបីឃ្លៀងឃ្លាតឡេីយ។ ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានចាត់ចែងឱ្យមន្ត្រីកាកបាទក្រហមកម្ពុជា នៅតាមសាខាចុះសួរសុខទុក្ខជនរងគ្រោះចំនួន ២៤នាក់ ដែលកំពុងសម្រាកព្យាបាលនៅមន្ទីរពេទ្យ និងផ្តល់ជូនក្នុងម្នាក់ៗថវិកាចំនួន ១លានរៀលផងដែរ។ សូមបញ្ជាក់ថា ជនរងគ្រោះទាំង ១៨នាក់ មានស្រុកកំណេីតនៅខេត្តកំពតចំនួន ៨នាក់, ខេត្តបាត់ដំបង ៣នាក់, ខេត្តក្រចេះ ២នាក់, ខេត្តស្ទឹងត្រែង ២នាក់, ខេត្តពោធិ៍សាត់ ១នាក់, ខេត្តត្បូងឃ្មុំ ១នាក់ និងខេត្តព្រៃវែង ១នាក់៕
ប្រភព៖ cabinet of samdech bun rany hunsen
ដោយ៖ ណារ៉ែន