លោក ផែង វណ្ណៈ ត្រូវបានសម្ដេចក្រឡាហោម ស ខេង តែងតាំងជា អនុប្រធានក្រុមការងារគណបក្សប្រជាជនកម្ពុជាឃុំព្រៃឃ្នេស ស្រុកមេសាង ខេត្តព្រៃវែង តាំងពីនៅក្នុងពន្ធនាគារ
យោងតាមសេចក្តីសម្រេចចុះថ្ងៃទី២៦ ខែមេសា ឆ្នាំ២០១៩ លោក ផែង វណ្ណៈ ត្រូវបានសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អនុប្រធានគណបក្សប្រជាជនកម្ពុជា និងជាប្រធានក្រុមការគណបក្សប្រជាជនកម្ពុជាខេត្តព្រៃវែង តែងតាំងជា អនុប្រធានក្រុមការងារគណបក្សប្រជាជនកម្ពុជាឃុំព្រៃឃ្នេស ស្រុកមេសាង ខេត្ត ព្រៃវែង ដដែល។
ដោយលោក ផែង វណ្ណៈ បានសរសេររៀបរាប់ថា៖ “សូមគោរពថ្លែងអំណរគុណសម្ដេចក្រឡាហោម ស ខេង ដែលនៅតែផ្ដល់សេចក្ដីទុកចិត្តតែងតាំងរូបខ្ញុំអោយមកបន្តបំរេីប្រជាពលរដ្ឋនៅមូលដ្ឋានឃុំព្រៃឃ្នេស។ សូមគោរពជូនពរ សម្ដេចក្រឡាហោម ស ខេង មានសុខភាពល្អ បរិបូរណ៍ អាយុយឺនយូរ ដេីម្បីបន្តរួមចំណែកដឹកនាំនាវាកម្ពុជារក្សាបានសុខសន្តិភាព និង ការអភិវឌ្ឍន៍”។
គួររំលឹកថាលោក ផែង វណ្ណៈ ត្រូវបានឃុំខ្លួនកាលពីថ្ងៃទី០២ ខែមេសា ឆ្នាំ២០១៩ និងត្រូវបានសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសលោក ផែង វណ្ណៈ ដាក់ពន្ធនាគាររយៈពេល១ឆ្នាំ ប៉ុន្តែអនុវត្តទោស តែ២ខែ១៥ថ្ងៃ ក្រៅពីនោះព្យួរ ពោលគឺលោកផែង វណ្ណៈ ត្រូវបានដោះលែង កាលពីថ្ងៃទី១៨ ខែមិថុនា ឆ្នាំ២០១៩។ លោក ផែង វណ្ណៈ ក៏បានបញ្ជាក់ថាក្រោយពេលដែលចេញពីពន្ធនាគារលោកនឹងបន្តការងារមនុស្សធម៌ ការងារសង្គមជាបន្តទៀតដេីម្បីបំរេីប្រជាជននិង ប្រទេសជាតិ ដោយមិនអោយមានកំហុសឆ្គងជាថ្មីម្ដងទៀតឡេីយ៕
ប្រភព៖ Vannak Pheng
ដោយ៖ ណារ៉ែន