យកចបកាប់វាយទៅលើព្រះសង្ឃបណ្ដាលឲ្យរងរបួសយ៉ាងដំណំ ព្រោះខឹងស្ដីបន្ទោសបន្ដិចបន្តួច
កណ្ដាល ៖ បុរសជាកូនសិស្សព្រះសង្ឃម្នាក់ ព្រោះតែខឹងព្រះសង្ឃស្ដីបន្ទោសបន្ដិចបន្តួច ស្ទុះទៅយកចបកាប់មកវាយទៅលើព្រះសង្ឃ បណ្ដាលឲ្យទទួលរងរបួសយ៉ាងដំណំ ។ ករណីហិង្សាដោយចេតនានេះ បានកើតឡើង នៅវេលាម៉ោង១៧និង៣០នាទី ថ្ងៃទី៥ ខែកក្កដា ឆ្នាំ២០១៩ ត្រង់ចំណុចក្នុងវត្ដស្ដៅកន្លែង ស្ថិតក្នុងភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្តាល ។
មន្ដ្រីនគរបាលស្រុកកៀនស្វាយបានឲ្យដឹងថា ជនសង្ស័យឈ្មោះ ផល សំណាង ហៅសឹង្ហា ភេទប្រុស អាយុ២៧ឆ្នាំ ជនជាតិខ្មែរ មានស្រុកកំណើតនៅភូមិដូង ឃុំបឹងរាំង ស្រុកកំរៀង ខេត្តបាត់ដំបង បច្ចុប្បន្នជាកូនសិស្សព្រះសង្ឃ ស្នាក់នៅក្នុងទីអារាមវត្តស្តៅកន្លែង ។ ចំណែកព្រះសង្ឃរងគ្រោះព្រះនាម ឃីន ខុនណា ភេទប្រុស អាយុ៣៤ឆ្នាំ ជនជាតិខ្មែរ គង់នៅទីអារាមវត្តស្តៅកន្លែង (រងរបួសលើផ្ទៃមុខខាងស្តាំក្រោមភ្នែកចំនួន១កន្លែង និងដៃខាងស្តាំចំនួន៣កន្លែង) ។ វត្ថុតាងដកហូតបានមាន៖ ចបកាប់ចំនួន១ដង ឈើផ្លែដែកមានប្រវែង១,២៥ ម៉ែត្រ ។
ប្រភពដដែលបន្ដថា នៅថ្ងៃកើតហេតុ ព្រះសង្ឃជនរងគ្រោះ បានប្រើជនសង្ស័យជាកូនសិស្សឲ្យទៅទិញសាប៊ូម្សៅ តែជនសង្ស័យមិនទៅទិញឲ្យព្រះសង្ឃរងគ្រោះទេ ខណះនោះព្រះសង្ឃរងគ្រោះក៏បានស្ដីបន្ទោសទៅលើ ជនសង្ស័យបន្តិចបន្តួច ស្រាប់តែជនសង្ស័យខឹងបានយកស្ទុះទៅយកចបកាប់វាយទៅលើព្រះសង្ឃរងគ្រោះ បណ្ដាលឲ្យរងរបួស ។
ក្រោយពីមានហេតុការណ៍កើតឡើង ព្រះសង្ឃរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដីឥដ្ឋ ដើម្បីចាប់ខ្លួនជនសង្ស័យចាត់ការតាមច្បាប់ ។ ក្រោយពីសមត្ថកិច្ចទទួលបានពាក្យបណ្ដឹង ភ្លាមនោះក៏ធ្វើការឃាត់ខ្លួនជនសង្ស័យយកមកប៉ុស្ដិ៍ធ្វើការសួរនាំ រួចកសាងសំណុំរឿងបញ្ជូនមកកាន់អធិការដ្ឋាននគរបាលស្រុក ចាត់ការតាមនីតិវិធីច្បាប់ ៕
ប្រភព៖ អគ្គស្នងការដ្ឋាននគរបាលជាតិ