ទៅដើរលេងនៅថៃ កុំញ៉ាំម្ហូបនេះឲ្យសោះ ព្រោះមន្ទីរសុខាភិបាលថៃបញ្ជាក់ថា ម្ហូបនេះធ្វើឲ្យប៉ះពាល់ដល់សុខភាព

ថៃ៖ ម្ហូបមួយប្រភេទរបស់ថៃ ដែលមានឈ្មោះដើមថា “Nam Prik Num” ឬតំបន់ខ្លះហៅថា “Chili Dip” គឺជាមុខម្ហូបមួយមុខ ដែលមានប្រជាប្រិយបំផុតសម្រាប់ប្រជាពលរដ្ឋថៃ។ ម្ហូបនេះផ្សំឡើងដោយការបុកម្ទេសយ៉ាងច្រើន និងលាយជាមួយគ្រឿងផ្សំជាច្រើនទៀត ហើយវាអាចត្រូវបានគេយកទៅញ៉ាំដោយជ្រលក់ជាមួយបន្លែ ជ្រលក់ជាមួយសាច់ និងអាហារផ្សេងៗតាមចំណូលចិត្តរបស់មនុស្សម្នាក់ៗ។  យ៉ាងណាក្តី បើយោងតាមមន្ទីរសុខាភិបាលថៃបានបញ្ជាក់ថា ម្ហូបនេះគឺគ្មានសុវត្ថិភាពគ្រប់គ្រាន់សម្រាប់ទទួលទាននោះទេ។

យោងតាមការណែនាំរបស់ក្រុមអ្នកជំនាញផ្នែកសុខភាពបានអះអាងថា អាហារដែលល្អសម្រាប់ទទួលទានគឺអាហារ ដែលមានផ្ទុកជាតិអាស៊ីត Benzoic ត្រឹមតែ ៥០០ មីលីក្រាមក្នុងអាហារមួយគីឡូក្រាម។ ដោយឡែកម្ហូប “Nam Prik Num”​​ ត្រូវបានគេរកឃើញថា មានផ្ទុកជាតិអាស៊ីត Benzoic ចាប់ពី ៨៩០ ដល់ ៥ ៦៤៩ មីលីក្រាមឯណោះក្នុងបរិមាណម្ហូបមួយគីឡូក្រាម។ ដូចនេះមានន័យថា ម្ហូបប្រភេទនេះមានផ្ទុកជាតិអាស៊ីតច្រើនលើសកម្រិតស្តង់ដារសុខភាព ដែលអាចប៉ះពាល់ដល់សុខភាពអ្នកទទួលទាន៕

អត្តបទ៖ ភក្តី