គេហទំព័រRealestate.com.khរៀបចំពានរង្វាន់អចលនទ្រព្យកម្ពុជា ជាលើកដំបូង
ភ្នំពេញ ក្រុមហ៊ុនគេហទំព័រRealestate.com.khសហការជាមួយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងក្រសួងសេដ្ឋកិច្ចនិងហិរញ្ញវត្ថុនឹងរៀបចំពានរង្វាន់អចលនវត្ថុកម្ពុជាឆ្នាំ២០១៨(Cambodia real estate award 2018)។ យោងតាមសេចក្តីប្រកាសព៌តមានរបស់គេហទំព័រ Realestate.com.khដែលបានចែកជូនបណ្តាញអ្នកសារព៌តមាន ក្នុងសន្និសីទសារព៌តមាននាព្រឹកថ្ងៃទី២៦ មិនានេះបានឲ្យដឹងថា ការរៀបចំពានរង្វាន់នេះ ដើម្បីជំរុញដល់វិស័យអចលនវត្ថុ ដែលជាការលើកទឹកចិត្តដល់អ្នកខិតខំប្រឹងប្រែង និងមានជំនាញវិជ្ជាជីវៈច្បាស់លាស់។ ក្រុមហ៊ុន អ្នកអភិវឌ្ឍន៍ និងភ្នាក់ងារអចលនវត្ថុ អាចដាក់ពាក្យចូលរួមកម្មវិធីនេះដោយឥតគិតថ្លៃ។ នេះជាលើកតំបូងនៅក្នុងប្រវត្តិសាស្រ្ត ដែលការខិតខំប្រឹងប្រែងនិងភាពជោគជ័យ នៃវិស័យអចលនវត្ថុត្រូវត្រួវទទួលស្គាល់ជាសាកល។
សេចក្តីប្រកាសព៌តមានដដែលបានបន្តថា លក្ខខ័ណ្ឌសម្រាប់ចូលរួមប្រកួតប្រជែងក្នុងកម្មវិធីនេះ គឺផ្តោតសំខាន់លើបីកម្រិត ក្រុមហ៊ុនខ្នាតតូចឬខ្នាតមធ្យម និងក្រុមហ៊ុនខ្នាតធំ ដែលគ្របដណ្តប់ល់អាជីវកម្មជាច្រើនប្រភេទនៅក្នុងវិស័យនេះ។ ការបង្កើតឲ្យមានពានរង្វាន់អចលនវត្ថុនេះ ក្នុងគោលបំណងកំណត់ពីស្តង់ដា នៃក្រុមហ៊ុនភ្នាក់ងារអចលនវត្ថុ ភ្នាក់ងារអចលនវត្ថុ និងគ្រប់គ្រងអចលនវត្ថុនៅកម្ពុជា។
អគ្គនាយកក្រុមហ៊ុនគេហទំព័រrealestate.com.kh លោកTom O’sullivanបានថ្លែងថា នេះគឺជាឳកាសដែលក្រុមហ៊ុនrealestate.com.kh ដើម្បីជម្រុញវិស័យអចលនវត្ថុកម្ពុជា ដោយផ្តល់ឳកាសដល់ក្រុមហ៊ុនទាំងអស់នៅក្នុងវិស័យ ដើ ម្បីឲ្យពួកគេបង្ហាញពីសមិទ្ឋិផល ដែលធ្វើបានកន្លងមក។លោកបន្តថា យើងមានភាពរីករាយ ក្នុងការប្រកាសធ្វើពានរង្វាន់អចលនវត្ថុ២០១៨ ក្រោមការគាំទ្រពីក្រសួងសេដ្ឋកិច្ចនិងហិរញ្ញវត្ថុ ហើយយើងសង្ឃឹមយ៉ាងមុតមាំថា ពានរង្វាន់ប្រចាំឆ្នាំនេះ នឹងក្លាយជាសករាជថ្មីមួយ និងឧត្តមភាពមួយសម្រាប់វិស័យអចលនវត្ថុកម្ពុជាទាំងមូល។
គណៈកម្មការរៀបចំពានរង្វាន់នេះ នឹងផ្តល់រង្វាន់ចំនួន៣០ដល់ក្រុមហ៊ុននានា ដែលបានចូលរួម និងជាប់ក្នុងកម្មវិធីនេះ។ ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុលោកម៉ី វ៉ាន់បានថ្លែងថា កម្មវិធីនេះគឺជាវេទិកាមួយ ដើម្បីលើកទឹកចិត្ត និងផ្តល់រង្វាន់ដល់ភ្នាក់ងារ ក្រុមហ៊ុនភ្នាក់ងារអចលនវត្ថុ ដែលធ្វើប្រតិបត្តិការប្រកបដោយក្រមសីលធ៌មវិជ្ជាជីវៈ និងអនុលោមតាមច្បាប់ និងបទបញ្ញត្តិដែលមានជាធរមាននៅកម្ពុជា។
ពានរង្វាន់នេះនឹងត្រូវប្រកាសនៅថ្ងៃទី២៧ មិនថុនាខាងមុខនេះ ហើយសំបុត្រសំរាវើចូលរួម និងឧបត្ថម្ភកម្មវិធីខាងលើ នឹងចាប់ផ្តើមលក់នៅសប្តាហ៍ខាងមុខនេះ។ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានថ្លែងថា យើងរីករាយក្នុងការធ្វើការងារនេះរួមគ្នា ដើម្បីលើកកំពស់ វិស័យនេះនៅកម្ពុជា ខណៈក្រុមហ៊ុនRealestate.com.khជាក្រុមហ៊ុនលេឋ១នៅកម្ពុជា ហេតុនេះយើងសម្រេចសហការគ្នាជាលើកតំបូង និងមិនមែនជាលើកចុងក្រោយទេ។
លោកបន្តថា “វាមិនមែនជាពានរង្វាន់របស់CVEA មិនមែនពានរង្វាន់របស់Realestate.com.khទេ តែសម្រាប់កម្ពុជា សម្រាប់វិស័យអចលនវត្ថកម្ពុជា”។
លោកបណ្ឌិតសុក ស៊ីផាន់ណាទីប្រឹក្សារាជរដ្ឋាភិបាល និងជាប្រធានគណកម្មការវាយតម្លៃពានរង្វាន់នេះបានមានប្រសាសន៍ថា ពានរង្វាន់នេះមានសារសំខាន់ណាស់ ដែលវានឹងលើកស្ទួយកិត្យានុភាពកម្ពុជា ក្នុងកម្រិតតំបន់និងពិភពលោក ហេតុនេះពានរង្វាន់នេះនឹងធ្វើឡើងដោយសុក្រិតភាពបំផុត និងឈរលើយុត្តិធ៌ម គុណតម្លៃ និងឯករាជ្យភាព។លោកបន្តថា ក្នុងការងារជាសាស្រ្តាចារ្យ ជាអ្នកផ្តល់ពិន្ទុ លោកមិនមែនជាមនុស្សដែលងាយផ្តល់ពិន្ទុល្អនោះទេ ហេតុនេះអ្នកចូលរួមក្នុងកម្មវិធីនេះ និងទទួលបានពានរង្វាន់នឹងកសាងកេរ្ត៍ឈ្មោះរបស់ខ្លួនបាន។
លោកបន្តថា “អ្វីជាសារផ្តាំផ្ញើររបស់ខ្ញុំ គឺក្រុមហ៊ុនឬភ្នាក់ងារអចលនវត្ថុដែលដាក់ពាក្យចូលរួមក្នុងកម្មវិធីនេះ កុំទាក់ទងជាមួយខ្ញុំឲ្យសោះ បើទាក់ទងនឹងមិនទទួលបានការវាយតម្លៃទេ”៕