ជនល្មើសសម្លាប់មនុស្ស ២២នាក់ នៅ El Paso ពិតជាផ្តោតគោលដៅលើជនជាតិម៉ិចស៊ីក ហើយអាចប្រឈមនឹងទោសប្រហារជីវិត ប្រសិនរកឃើញថាមានពិរុទ្ធ

ប្រព័ន្ធផ្សព្វផ្សាយអាមេរិកបាននិយាយថា ជនសង្ស័យដែលត្រូវបានចោទប្រកាន់ថា បានសម្លាប់មនុស្ស ២២នាក់ នៅឯផ្សារ Walmart ក្នុងទីក្រុង El Paso រដ្ឋ Texas បានសារភាពថា ខ្លួនពិតជាបានផ្តោតគោលដៅទៅលើប្រជាជនម៉ិចស៊ីកូ។ ហើយឧក្រិដ្ឋកម្មនេះត្រូវបានគេជឿថា ជាការបាញ់ប្រហារដ៏សាហាវបំផុតប្រឆាំងនឹងពួកឡាទីណូនៅសហរដ្ឋអាមេរិកក្នុងប្រវត្តិសាស្ត្រថ្មីៗនេះ ហើយវាត្រូវបានជម្រុញដោយ «ការរើសអើងជាតិសាសន៍»។

ការបាញ់ប្រហារបានកើតឡើងប៉ុន្មានម៉ោង មុនពេលការបាញ់ប្រហារដ៏ធំមួយផ្សេងទៀតនៅ Dayton ក្នុងរដ្ឋ Ohio។ ឧប្បត្តិហេតុទាំងពីរនេះបានជំរុញឱ្យមានការជជែកវែកញែកថ្នាក់ជាតិអំពីច្បាប់កាំភ្លើង ដោយគណបក្សសាធារណរដ្ឋបានបង្ហាញថា ពួកគេអាចបើកចំហ ដើម្បីរឹតបន្តឹងការត្រួតពិនិត្យលើប្រវត្តិរូបអ្នកទិញ។ មន្ត្រីសហព័ន្ធនិយាយថា ពួកគេកំពុងពិចារណាការចោទប្រកាន់ឧក្រិដ្ឋកម្មប្រឆាំងនឹងជនល្មើស Patrick Crusius ដែលអាចប្រឈមនឹងទោសប្រហារជីវិតប្រសិនបើត្រូវបានរកឃើញថា មានពិរុទ្ធពីបទឃាតកម្មដ៏ធំនេះ៕

អត្ថបទ៖ លីដា