សកម្មភាពត្រួតពិនិត្យជាតិអាកុល និងសារធាតុញៀន ព្រមទាំងពង្រឹងច្បាប់ចរាចរណ៍ នៅខណ្ឌមានជ័យ
កម្លាំងគណៈបញ្ជាការឯកភាពខណ្ឌមានជ័យ បានបន្តអនុវត្តន៍រឹតបន្តឹងនូវច្បាប់ចរាចរណ៍ផ្លូវគោក និងត្រួតពិនិត្យអាវុធជាតិផ្ទុះជាប្រចាំ នៅតាមដងផ្លូវនានាក្នុងមូលដ្ឋាន ឲ្យមានប្រសិទ្ធភាព ដើម្បីកាត់បន្ថយបញ្ហាគ្រោះថ្នាក់ចរាចរណ៍ និងដើម្បីរក្សាសន្តិសុខជូនប្រជាពលរដ្ឋ ក៏ដូចជាអ្នកដំណើរនៅពេលយប់ព្រលប់។ ការត្រួតពិនិត្យតម្រូវឲ្យអ្នកបេីកបរនិងអ្នករួមដំណេីរតាមម៉ូតូ ត្រូវពាក់មួកសុវត្ថិភាព និងដាក់កញ្ចក់មើលក្រោយ ហេីយម៉ូតូត្រូវតែពាក់ស្លាកលេខ ចំណែកឯឡានត្រូវពាក់ខ្សែក្រវ៉ាត់ផងដែរ ដើម្បីសុវត្ថិភាពផ្ទាល់ខ្លួន។
ក្នុងប្រតិបត្តិការត្រួតពិនិត្យនេះ ប្រេីកម្លាំងសរុប៦៥នាក់ ក្នុងនោះមានការចូលរួមដូចជា មានកម្លាំងអធិការដ្ឋាននគរបាលខណ្ឌមានជ័យ ២០នាក់ ដឹកនាំដោយលោកវរសេនីយ៍ទោ ម៉េង វិមានតារា អធិការខណ្ឌមានជ័យ និងអធិការរង៣រូប មានលោកវរសេនីយ៍ទោ នូ ទូច លោកវរសេនីយ៍ត្រី ជឹម សុភ័ក្រ និងលោកវរសេនីយ៍ទោ នូ ទីន និងកម្លាំងអាវុធហត្ថខណ្ឌមានជ័យ ៨នាក់ ដឹកនាំដោយលោកអនុសេនីយ៍ឯក ទឹម ស៊ី ជំនួយការអាវុធហត្ថខណ្ឌមានជ័យ និងកម្លាំងសណ្ដាប់ធ្នាប់ខណ្ឌ+សង្កាត់ ៣៧នាក់ ដឹកនាំដោយលោក ឡេង ចន្ទសុភ័ត្រា ប្រធានសណ្ដាប់ធ្នាប់ខណ្ឌ បានចុះដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ផ្លូវគោក ជាតិអាកុល និងសារធាតុញៀន នៅត្រង់ចំណុចមុខឃ្លាំងដែកក្រុមហ៊ុន វេងហួត លេីកំណាត់ផ្លូវ២៧១ ភូមិ៧ ស្ថិតក្នុងសង្កាត់ចាក់អង្រែលើ ខណ្ឌមានជ័យ៕
ប្រភព៖ បង ម៉េង អ្នកសារព័ត៌មាន