ហាងលក់ទំនិញទាំងតូច និងធំមួយចំនួននៅប្រទេសថៃ នឹងឈប់ប្រើថង់ផ្លាស្ទិកទៀតហើយ

យោងតាមរដ្ឋាភិបាលថៃឱ្យដឹងថា ហាងលក់ទំនិញទាំងតូច និងធំ ចំនួន ៤២ នឹងឈប់ប្រើថង់ផ្លាស្ទិក ចាប់ពីថ្ងៃទី០១ ខែមករា ដើមឆ្នាំ២០២០។ ការហាមឃាត់នេះអាចជាប្រតិកម្មថ្មីៗរបស់ប្រជាជនថៃ បន្ទាប់ពីសត្វឌូហ្គុង (dugong) ជាទីស្រឡាញ់របស់ពួកគេបានស្លាប់ ដោយសារសំណល់ផ្លាស្ទិកនេះ។ នៅសប្តាហ៍នេះទីភ្នាក់ងារបរិស្ថានរដ្ឋាភិបាលចំនួនពីរ បានទៅជួបជាមួយអ្នកលក់រាយឯកជនធំៗរាប់សិបនាក់ ដើម្បីពិភាក្សាពីផែនការបញ្ឈប់ការលក់ និងប្រើប្រាស់ថង់ផ្លាស្ទិក (លើកលែងតែរបស់ក្តៅៗ) នៅក្នុងហាងទូទាំងប្រទេស។

រដ្ឋមន្រ្តីក្រសួងធនធាន និងបរិស្ថានលោក Warawut Silpa-archa បាននិយាយថា វិធានការនេះនឹងកាត់បន្ថយការប្រើប្រាស់ផ្លាស្ទិកយ៉ាងច្រើននៅក្នុងប្រទេសថៃ។ គោលបំណងរបស់លោកគឺចង់អោយព្រះរាជាណាចក្រនេះគ្មានផ្លាស្ទិកទាំងស្រុងនៅ ឆ្នាំ២០២១។ បញ្ជីហាងដែលនឹងឈប់ប្រើថង់រួមបញ្ចូលទាំង 7-Eleven ផងដែរ ដោយសារហាងនេះបានប្រើប្រាស់ថង់យ៉ាងច្រើនជារៀងរាល់ថ្ងៃ។ វិទ្យាស្ថានផ្លាស្ទិកថៃក៏បានប៉ាន់ស្មានថា ប្រទេសថៃផលិតផ្លាស្ទិកចំនួន ៥.៥លានក្នុងមួយឆ្នាំៗ សម្រាប់គោលបំណងវេចខ្ចប់។ ប៉ុន្តែទោះជាយ៉ាងណាក៏ដោយមានតែសំរាម ៥% ប៉ុណ្ណោះដែលត្រូវបានកែច្នៃឡើងវិញ៕

អត្ថបទ៖ លីដា