ផ្ទះរាប់សែនខ្នងនៅខេត្តឈីបបារបស់ជប៉ុន នៅតែមិនទាន់មានអគ្គិសនី និងទឹកគ្រប់គ្រាន់ បន្ទាប់ពីព្យុះ Faxai បានវាយប្រហារយ៉ាងចាស់ដៃ

ផ្ទះសែនខ្នងនៅក្នុងខេត្តឈីបបា (Chiba) មានការដាច់អគ្គិសនី និងទឹកនៅឡើយ បន្ទាប់ពីព្យុះ Faxai បានហែកហួរតំបន់តូក្យូយ៉ាងខ្លាំងកាលពីថ្ងៃច័ន្ទ។ ព្យុះនេះបានបន្សល់ឱ្យផ្ទះចំនួន ៦៤០,០០០ខ្នង នៅក្នុងអាណាខេត្ត គ្មានថាមពលអគ្គិសនីប្រើប្រាស់ និងបណ្ដាលឱ្យមនុស្សពីរនាក់បានស្លាប់។ ក្រុមការងារក៏កំពុងស្តារឡើងវិញនូវបញ្ហា និងកំពុងធ្វើឱ្យល្អជាបណ្តើរៗហើយ។ ប៉ុន្តែក្រុមហ៊ុនផ្គត់ផ្គង់អគ្គិសនី Tokyo Electric Power Company នៅតំបន់នោះបានឱ្យដឹងថា នឹងត្រូវការពេលវេលាបន្ថែមទៀត ដើម្បីស្តារការផ្គត់ផ្គង់អគ្គិសនីដល់ផ្ទះដែលរងផលប៉ះពាល់ទាំងអស់។

អាជ្ញាធរក្នុងតំបន់និយាយថា សាលារដ្ឋជាង ២០០ ក៏បានផ្អាកថ្នាក់រៀនរបស់ពួកគេកាលពីថ្ងៃព្រហស្បតិ៍។ ពួកគេរំពឹងថា សាលារៀនជាច្រើននឹងត្រូវបិទផងដែរនៅថ្ងៃសុក្រ ដោយសារកង្វះអគ្គិសនី និងទឹកនេះ។ ខ្យល់កន្ត្រាក់របស់ Faxai បានបំផ្លាញផ្ទះជាច្រើន ដែលធ្វើឱ្យក្រុមសង្គ្រោះមានការខ្វះខាតគ្រឿងសម្ភារ, ការផ្គត់ផ្គង់ និងគ្មានបណ្ដាញទូរស័ព្ទចល័តទាក់ទង៕

អត្ថបទ៖ លីដា