អបអរសាទរ! អ្នកគ្រូ នាង ផល្លា ដែលខំប្រឹងបង្ហាត់បង្រៀន កុមារគ ថ្លង់ ជិត៣០ឆ្នាំហើយនោះ ឥលូវនេះត្រូវបានព្រះមហាក្សត្រត្រាស់បង្គាប់ តែងតាំងជាទីប្រឹក្សាក្រសួងអប់រំ
អ្នកគ្រូ នាង ផល្លា ត្រូវបានមហាជនស្គាល់ និងគោរពកោតសរសើរ ដោយសារតែការខិតខំប្រឹងប្រែងអប់រំបង្ហាត់បង្រៀន កុមារគ ថ្លង់ នៅប្រទេសកម្ពុជាអស់រយៈកាលជិត ៣០ឆ្នាំកន្លងមកនេះ ហើយអ្នកគ្រូ ផល្លា ក៏ធ្លាប់ទទួលបានមេដាយមហាកិត្តិយស ពីសម្តេចតេជោ ហ៊ុន សែន នាយករដ្ឋមន្រ្តីនៃរាជរដ្ឋាភិបាល ព្រះរាជាណាចក្រកម្ពុជា នូវមេដាយថ្នាក់មហាសេរីវឌ្ឍន៍ (មេដាយ មហាកិត្តិយស លំដាប់ទី២) ផងដែរ។ មិនត្រឹមតែប៉ុណ្ណោះ អ្នកគ្រូ ផល្លា ក៏ធ្លាប់ត្រូវបានជ្រើសរើសជាប់ក្នុងបញ្ជីចុងក្រោយ ក្នុងចំណោមគ្រូបង្រៀន ១០ រូប សម្រាប់ទទួលពានរង្វាន់គ្រូឆ្នើមពិភពលោក ពីកម្មវិធីពានរង្វាន់គ្រូឆ្នើមពិភពលោក Global Teacher Prize ទៀតផង។
ថ្មីនេះផងដែរ អ្នកគ្រូ ផល្លា ត្រូវបានព្រះមហាក្សត្រព្រះអង្គទ្រង់ប្រោសព្រះរាជទាន ក្នុងការត្រាស់បង្គាប់តែងតាំង និងផ្តល់ឋានៈអ្នកគ្រូ ជាទីប្រឹក្សាក្រសួងអប់រំ យុវជន និងកីឡា មានឋានៈស្នើអគ្គនាយក បន្ថែមលើមុខងារបច្ចុប្បន្នផងដែរ។ ការតែងតាំងនេះធ្វើឲ្យមហាជនជាច្រើនត្រេកអរយ៉ាងខ្លាំង ចំពោះការខិតខំប្រឹងប្រែងរបស់អ្នកគ្រូ ដែលសាកសមនឹងទទួលបានឋានៈបែបនេះ៕
អត្ថបទ៖ សេម