មកដឹងពីលក្ខណៈពិសេសរូបសំណាកសម្តេចសមុទ្រ និងទេពមច្ឆា បង្កើតពីសំរាម ដែលបង្ហាញខ្លួនក្នុងពិធីបុណ្យសមុទ្រ
ខេត្តកំពត៖ ពិធីបុណ្យសមុទ្រឆ្នាំនេះត្រូវបានប្រារព្ធធ្វើក្នុងខេត្តកំពត នៅថ្ងៃទី ២០-២២ ខែធ្នូ ឆ្នាំ២០១៩ កន្លងទៅថ្មីៗនេះ ហើយនេះគឺជាការប្រារព្ធពិធីបុណ្យសមុទ្រលើកទី៨ ក្នុងជុំទី២ ផងដែរនៅខេត្តកំពត។ ពិធីបុណ្យសមុទ្រនៅឆ្នាំនេះ យើងឃើញមានការតាំងពិព័រណ៍សមិទ្ធផល មហោស្រពម្ហូបអាហារ និងភេសជ្ជៈ និងគម្រោងអភិវឌ្ឍតំបន់ឆ្នេរ ជាច្រើនស្តង់ ហើយអ្វីដែលទាក់ទាញចំណាប់អារម្មណ៍មហាជនបំផុតនោះគឺរូបសំណាកស្តេចសមុទ្រ និងនាងទេពមច្ឆា ដែលបង្កើតឡើងដោយកាកសំណល់សំរាម និងប្លាស្ទិក។
រូបសំណាកស្តេចសមុទ្រ និងនាងទេពមច្ឆា នេះត្រូវបានបង្កើតឡើងដោយលោក រៀម មុនីស៊ីឡុង វ័យ៣២ឆ្នាំ ដែលជាសិល្បករឆ្នើមកែច្នៃសំរាមធ្វើជាគ្រឿងតុបតែងលម្អ និងវត្ថុអនុស្សាវរីយ៍ នៅខេត្តសៀមរាប ហើយលោកបានបង្កើតរូបសំណាកនេះឡើងដោយមានការចូលរួមពីសិល្បករចំនួន០៦រូបផ្សេងទៀត ហើយចំពោះសម្ភារៈ ឬវត្ថុធាតុដើម ដែលយកមកបង្កើតជារូបសំណាកនោះ គឺច្នៃចេញពីសំរាមទាំងអស់ រួមមានដូចជាកាកអំពៅ ដបទឹកសុទ្ធ ស្រកាត្រី សំបកពងទា សំបកពងមាន់ ដើមឈូក និងកែវប្លាស្ទិក ដែលគេបោះចោលតាមដងផ្លូវសាធារណៈជាដើម។
រូបសំណាកស្តេចសមុទ្រ គឺតំណាងឲ្យសមុទ្រទាំងមូល រីឯទេពមច្ឆាតំណាងឲ្យធនធានធម្មជាតិ ជីវ:ចម្រុះនៃសមុទ្រ ដែលល្អស្អាត ត្រូវចូលរួមស្រឡាញ់ និងការពារ និងអភិរក្សអោយបានល្អ ហើយរូបសំណាកទាំង២នេះ មានទំហំបណ្តោយប្រវែង១,៣០សម និងកំពស់ប្រហែល២,០០ម។ គោលបំណង ដែលលោកបង្កើតរូបសំណាកនេះ គឺដើម្បីចង់បំផុសគំនិតឲ្យបងប្អូនប្រជាពលរដ្ឋចេះគិតគូរស្រលាញ់បរិស្ថាន ទុកដាក់សំរាមឲ្យបានត្រឹមត្រូវ ជាពិសេសរួមគ្នាកាត់បន្ថយការប្រើប្រាស់ប្លាស្ទិក ដែលកំពុងតែបង្កផលប៉ះពាល់យ៉ាងខ្លាំងដល់មនុស្សសត្វ៕
អត្ថបទ៖ សេម
រូបភាព៖ ក្រសួងបរិស្ថាន