មកដឹងពីផ្លូវវៀង២ខ្សែសម្រាប់ធ្វើដំណើរ នៅថ្ងៃសម្ពោធដាក់ឲ្យប្រើប្រាស់ស្ពានអាកាសថ្មើរជើងឆ្លងកាត់ផ្លូវជាតិលេខ៤
យោងតាមការបញ្ជាក់ពីស្នងការដ្ឋាននគរបាលខេត្តកំពង់ស្ពឺ បានឲ្យដឹងថា កំណាត់ផ្លូវជាតិលេខ ៤ ចន្លោះបង្គោលគីឡូម៉ែត្រលេខ ៤៧-៤៨ ត្រង់ចំណុចផ្សាកំពង់ស្ពឺ បច្ចុប្បន្នរដ្ឋបាលសាលាខេត្តកំពង់ស្ពឺ បានដំណេីរការសាងសង់ស្ពានអាកាសថ្មេីជេីង «SKY WALK»ឆ្លងកាត់ផ្លូវជាតិលេខ ៤ គិតមកដល់ពេលនេះគឺរួចរាល់១០០% សម្ពោធដាក់ឲ្យដំណើរការប្រេីប្រាស់ជាផ្លូវការនៅព្រឹកថៃ្ងទី២៩ខែធ្នូ ឆ្នាំ២០១៩ ខាងមុខនេះ។
ដូច្នេះនៅព្រឹកថៃ្ងអាទិត្យទី២៩ ខែធ្នូ ឆ្នាំ២០១៩ ចាប់ពី វេលាម៉ោង ០៦:៣០នាទីព្រឹក រហូតដល់វេលាម៉ោង ១១:៣០ នាទី រដ្ឋបាលសាលាខេត្តកំពង់ស្ពឺបានរៀបចំពិធីសម្ពោធដាក់ឲ្យប្រើប្រាស់ជាផ្លូវការស្ពានអាកាសអ្នកដំណេីរថ្មេីជេីង «SKY WALK» អាស្រ័យហេតុនេះ ស្នងការដ្ឋាននគរបាលខេត្តកំពង់ស្ពឺ សូមគោរពជម្រាបជាដំណឹងដល់បងប្អូនប្រជាពលរដ្ឋដែលមានបំណងធ្វើដំណើរឆ្លងកាត់ខេត្តកំពង់ស្ពឺ សូមមេត្ដាយោគយល់និងជ្រាប ពិសេសនគរបាលចរាចរណ៍បានកំណត់ផ្លូវវាងនៅចំណុចភ្លើងស្តុបចំនួនពីរកន្លែង ស្ថិតលេីកំណាត់ផ្លូវជាតិលេខ ៤ មានដូចខាងក្រោម៖
+ ពីទិសខាងកេីត ឆ្ពោះទៅទិសខាងលិច ចំណុចភ្លើងស្តុប មុខមន្ទីរសាធារណៈការខេត្ដកំពង់ស្ពឺ មានផ្លូវវាងបត់ឆ្វេងដៃឡេីងទៅកាត់មុខពន្ធនាគារខេត្ដ ស្របតាមផ្លូវមុខរដ្ឋបាលខេត្ដកំពង់ស្ពឺ មុខស្នាក់ការគណបក្សប្រជាជនកម្ពុជារង្វង់មូលវិមានឯករាជ្យបត់ស្ដាំដៃឆ្ពោះមកស្ពានថ្មថ្មី ឡេីងមកផ្លូវជាតិលេខ៤ ចំណុចភ្លេីងស្ដុប ផ្លូវបំបែកច្បារមន ចន្លោះគីឡូម៉ែត្រលេខ ៤៨-៤៩ តែម្ដង។
+ ពីទិសខាងលិច ឆ្ពោះទៅទិសខាងកេីត បត់ស្ដាំដៃ ត្រង់ចំណុចភ្លើងស្តុបច្បារមន គីឡូម៉ែត្រលេខ ៤៨-៤៩ តាមស្ពានថ្មីសំដៅមកវិមានឯករាជ្យ បត់ស្ដាំតាមផ្លូវបេតុងមុខពន្ធនាគារខេត្ដរួចបត់ឆ្វេងដៃឡេីងមកតាមស្ពានថ្មថ្មី ឆ្ពោះទៅកាន់ផ្លូវជាតិលេខ៤ តែម្ដង។
