រាជធានីភ្នំពេញ៖ ករណីក្មេងស្រីម្នាក់ដែលត្រូវបានក្មេងស្រីមួយក្រុមវាយនៅក្នុងថ្នាក់រៀន នៃវិទ្យាល័យផ្សារដេីមថ្កូវ ត្រូវបានដោះស្រាយបញ្ចប់ ដោយភាគីជនរងគ្រោះយល់ព្រមដកពាក្យបណ្តឹង ជនបង្ក និងអាណាព្យាបាល ក៏បានសូមទោសដល់ជនរងគ្រោះ ក្រុមគ្រួសារ និងសាធារណ:ជនទាំងអស់ ចំពោះកំហុសឆ្គងដ៏ធ្ងន់ធ្ងរដែលគាត់បានធ្វេី ម្យ៉ាងវិញទៀតក៏មានការឯកភាពយល់ព្រមពីលោក កែវ សុធា ព្រះរាជអជ្ញា នៃអយ្យការ អមសាលាដំបូងរាជធានីភ្នំពេញផងដែរ ។

បន្ទាប់ពីទទួលបានព័ត៌មាន និងពាក្យបណ្តឹងពីជនរងគ្រោះភ្លាម កម្លាំងប៉ុស្តិ៍ផ្សារដេីមថ្កូវនៃអធិការដ្ឋាននគរបាលខណ្ឌចំការមន បានកោះហៅជនបង្ក និងអាណាព្យាបាល ដេីម្បីធ្វេីការសាកសួរ ទាក់ទងទៅនឹងករណីវាយសិស្សស្រីម្នាក់ក្នុងថ្នាក់ កាលពីថ្ងៃទី១៥ ខែធ្នូ ឆ្នាំ២០១៩ ។

ក្រោយពីធ្វេីការសាកសួរ និងធ្វេីកំណត់ហេតុរួច ជនបង្កត្រូវបានបញ្ជូនមកការិយាល័យព្រហ្មទណ្ឌកំរិតស្រាល ដេីម្បីធ្វេីការបន្តលេីករណីនេះ ជនបង្កបានសារភាពនូវកំហុស ថាខ្លួនពិតជាបានវាយក្មេងស្រីម្នាក់នេះមែន ។

បន្ទាប់ពីការជួបជជែកគ្នារវាងក្រុមគ្រួសារជនរងគ្រោះ និងក្រុមគ្រួសារជនបង្ក ជាលទ្ធផលក្រុមគ្រួសារជនរងគ្រោះបានយល់ព្រមបញ្ចប់រឿងនេះដោយដកពាក្យបណ្តឹង ហេីយជនបង្ក និងក្រុមគ្រួសារក៏បានធ្វេីការសុំទោសជាសាធារណ: ជាពិសេសគឺអាណាព្យាបាលជនបង្កបានសូមទោស ដែលគាត់មិនបានណែនាំអប់រំកូនៗគាត់អោយបានល្អ និងសូមសន្យាថាមិនប្រព្រឹត្តិអំពេីបែបនេះទៀតឡេីយ ដែលជាទង្វេីមួយដែលសង្គមស្អប់ខ្ពេីមយ៉ាងខ្លាំង ។

ម្យ៉ាងវិញទៀតគ្រួសារជនរងគ្រោះ ក៏បានបញ្ជាក់ថា ដោយសារគាត់មានការអាណិតអាសូរដល់ក្រុមគ្រួសារ និងជនបង្កដែលជាអនីតិជន ដូច្នេះហេីយទេីបគាត់យល់ព្រមលេីកលែងទោស និងទុកឱកាសដេីម្បីកែប្រែខ្លួនអោយក្លាយជាសិស្សល្អ ក្មេងល្អនៅក្នុងគ្រួសារ និងសង្គមជាតិ៕

ប្រភព៖ ស្នងការដ្ឋាននគរបាលរាជធានីភ្នំពេញ