ពិធីករឌីជេ ឡាយអិន ត្រូវតុលាការផ្តន្ទាទោសដាក់ពន្ធនាគារ៤ឆ្នាំ ពីបទជួញដូរគ្រឿងញៀន
ភ្នំពេញ៖ ពិធីករឌីជេ ឡាយអិន និងបក្ខពួក៣នាក់ទៀត កាលពីរសៀលថ្ងៃទី២០ ខែមករា ឆ្នាំ២០២០ ម្សិលមិញនេះ ត្រូវតុលាការសម្រេចដាក់ទោសឲ្យជាប់ពន្ធនាគារ រយៈពេលពី៤ឆ្នាំរហូតដល់១៥ឆ្នាំ ពីបទជួញដូរគ្រឿងញៀន និងកាន់កាប់អាវុធខុសច្បាប់។ ដោយពិធីករឌីជេ ឡាយអិន ឈ្មោះពិត ហែម បូរិទ្ធ អាយុ៣៣ឆ្នាំ និង ឈ្មោះ ម៉ៅ ស្រីណា ភេទស្រី អាយុ៣៨ឆ្នាំ ត្រូវផ្តន្ទាទោសដាក់ពន្ធនាគារម្នាក់ៗ៤ឆ្នាំនិងពិន័យ៦លានរៀល ចំណែកបក្ខពួក២នាក់ទៀតមាន ឈ្មោះ អុិន សាខន ផ្តន្ទាទោសដាក់ពន្ធនាគារ១១ឆ្នាំពិន័យ២០លានរៀល និងឈ្មោះស៊ិន សម្ភស្ស ដាក់ពន្ធនាគារ ១៥ឆ្នាំ ពិន័យ២០លានរៀល។
សូមរំលឹកថា អតីតពិធីករ ឌីជេ ឡាយអិន និងបក្ខពួក៣នាក់ទៀត ត្រូវបានជាប់ចោទពីបទជួញដូរដោយខុសច្បាប់នូវសារធាតុញៀន និងបទកាន់កាប់អាវុធដោយខុសច្បាប់ ដែលបានប្រព្រឹត្តកាលពីថ្ងៃទី១៩ ខែធ្នូ ឆ្នាំ២០១៨ ស្ថិតនៅមជ្ឈមណ្ឌលកម្សាន្តរ៉ុក។ សមត្ថកិច្ចដកហូតវត្ថុតាងនៅក្នុងបន្ទប់១០៨ ក្នុងមជ្ឈមណ្ឌលកម្សាន្តរ៉ុក រួមមាន ១.ថ្នាំមេតំហ្វេតាមីន(ICE)ទម្ងន់៣៧៤.៣៩ក្រាម ២.សារធាតុញៀនប្រភេទអ៊ិចស្តាស៊ីចំនួន១៥៦២គ្រាប់ ស្មើទម្ងន់ និង៦០៩.៣៣ក្រាម (សរុបជាង១គីឡូក្រាម) ៣.អាវុធខ្លី១ដើម (ឡុក) ៤.ជញ្ជីងថ្លឹងគ្រឿងញៀនធំ១គ្រឿង និងតូច២គ្រឿង៕
