Tesla ក្លាយជាក្រុមហ៊ុនមានតម្លៃបំផុតទី២ នៅលើពិភពលោក ជាមួយនឹងតម្លៃទីផ្សារជាង ១០០ ពាន់លានដុល្លារអាមេរិក
- BY
- autoadmin
- January 24, 2020
ក្រុមហ៊ុន Tesla បានក្លាយជាក្រុមហ៊ុនផលិតរថយន្ត ដែលមានតម្លៃបំផុតលំដាប់ទី២ នៅលើពិភពលោក ដែលមានតម្លៃទីផ្សារ ១០២.៧ពាន់លានដុល្លារ។ ក្រុមហ៊ុនផលិតរថយន្តដើរដោយថាមពលអគ្គិសនីមួយនេះ បានវ៉ាដាច់ក្រុមហ៊ុន Volkswagen របស់ប្រទេសអាឡឺម៉ង់ ខណៈក្រុមហ៊ុន Toyota Motor ឈរនៅចំណាត់ថ្នាក់លេខ១។ តម្លៃភាគហ៊ុនរបស់ក្រុមហ៊ុន Tesla មានតម្លៃ ៥៦៩ដុល្លារ នៅពេលការជួញដូរបានបញ្ចប់នៅថ្ងៃពុធ ដែលជាមូលហេតុតម្លៃទីផ្សាររបស់ខ្លួនកើនឡើង។ តម្លៃភាគហ៊ុនរបស់ក្រុមហ៊ុនផលិតរថយន្ត Tesla បានកើនឡើងទ្វេដង ក្នុងរយៈពេលបីខែកន្លងមកនេះ។
ការចាប់អារម្មណ៍របស់វិនិយោគិនភាគច្រើនគឺទៅលើរោងចក្រថ្មីរបស់ Tesla នៅស៊ាងហៃ ដែលជាមូលដ្ឋានផលិតកម្មដំបូងរបស់ខ្លួននៅក្រៅសហរដ្ឋអាមេរិក។ ពួកគេជឿជាក់ថា ការពង្រីកនេះធ្វើឱ្យក្រុមហ៊ុនស្ថិតក្នុងជំហរមួយ ដើម្បីពន្លឿនការលក់នៅក្នុងប្រទេសចិន ដែលជាទីផ្សាររថយន្តធំបំផុតរបស់ពិភពលោក។ ទោះយ៉ាងណាអ្នកវិភាគខ្លះនិយាយថា ក្រុមហ៊ុន Tesla មានតម្លៃថ្លៃហួសហេតុ ព្រោះទិន្នផលរបស់វាមានត្រឹមតែ ៣% នៃរថយន្តតូយ៉ូតា ឬ Volkswagen ប៉ុណ្ណោះ៕
អត្ថបទ៖ លីដា
- Share This Post: