ភ្លៀងកក់ខែមួយមេ ទុស្សេខ្សែភ្លេីងលេីបង្គោលឆេះរាលដាលតូបលក់ខោអាវ និងលក់គ្រឿងក្រអូប អស់ជិត៣០តូប
រាជធានីភ្នំពេញ ៖ បង្គោលភ្លើងមួយកន្លែង បន្ទាប់ពីមានភ្លៀងធ្លាក់មួយមេធំ បណ្តាលឲ្យឆ្លងចរន្តអគ្គិសនីឆេះចេញជាអណ្ដាតភ្លេីង រាលដាលដល់តូបលក់ខោអាវ និងគ្រឿងក្រអូបផ្សេងៗក្នុងផ្សារឯកជនតូចមួយដែលនៅក្បែរនោះអស់ជិត៣០តូប បង្កអោយមានការភ្ញាក់ផ្អើលដល់រថយន្តពន្លត់អគ្គីភ័យជាច្រេីនគ្រឿង ចេញអន្តរាគមន៍បាញ់ពន្លត់ ។ ហេតុការណ៍អគ្គិភ័យនេះបានកេីតឡេីងកាលពីវេលាម៉ោង០៤:២៥នាទីទៀបភ្លឺ ឈានចូលថ្ងៃទី៣១ ខែមករា ឆ្នាំ២០២០ នៅចំណុចផ្សារខោអាវ (ជិតរោងចក្រអ៉ីខាង) ដីឡូត៍លេខ៤២ លេីផ្លូវវេងស្រេង ក្រុម២ ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
បេីតាមសេចក្ដីរាយការណ៍ពីអ្នកយកព័ត៌មានយេីងបានអោយដឹងថា គេសង្កេតឃេីញមានកម្លាំងគណៈបញ្ជាការឯកភាពខណ្ឌមានជ័យ ដឹកនាំដោយលោក ពេជ្រ កែវមុនី អភិបាលខណ្ឌ រួមទាំងអាជ្ញាធរសង្កាត់ស្ទឹងមានជ័យទី៣ មានទាំងលោកចៅសង្កាត់ និងមេប៉ុស្តិ៍ និងកម្លាំងអធិការដ្ឋាននគរបាលខណ្ឌមានជ័យ និងកម្លាំងអាវុធហត្ថខណ្ឌមានជ័យ និងកម្លាំងប្រជាការពារខណ្ឌ ជាពិសេសកម្លាំងក្រុមពន្លត់អគ្គីភ័យបានសហការគ្នា ក្នុងការអន្តរាគមន៍បាញ់ពន្លត់អគ្គិភ័យមួយនេះ រហូតទាល់តែរលត់ទាំងស្រុង នាវេលានៅម៉ោងជិត៦ព្រឹកថ្ងៃដដែលនេះ ដោយប្រេីរថយន្តពន្លត់អគ្គិភ័យបាញ់ពន្លត់ចំនួន៩គ្រឿង ក្នុងនោះមានរថយន្តកង់រាជធានីអាវុធហត្ថរាជធានីភ្នំពេញ ចំនួន២គ្រឿង រថយន្តស្រាបៀរ កម្ពុជា១គ្រឿង រថយន្តពន្លត់អគ្គីភ័យរបស់ស្នងការរាជធានីភ្នំពេញ ចំនួន៦គ្រឿង ។
សមត្ថកិច្ចបានឱ្យដឹងថា ទីតាំងដែលរងការឆាបឆេះនេះមានម្ចាស់ដីឈ្មោះ ចែ ចន្ធូ ភេទស្រី អាយុ ជាង៥០ឆ្នាំ រស់នៅម្ដុំគិរីរម្យ ក្នុងសង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ។ សមត្ថកិច្ចខណ្ឌមានជ័យ បានអោយដឹងថា ក្នុងហេតុការណ៍អគ្គិភ័យនេះ គឺមិនបណ្ដាលឲ្យមានគ្រោះថ្នាក់ដល់មនុស្សនោះទេ គឺគ្រាន់តែខូចខាតសំភារៈតូបលក់ដូរតូចៗ ទំហំ២គុណនឹង៤ម៉ែត្រ ប្រហែលជា ៣០តូប ធ្វើពីដែកប្រក់ស័ង្កសី (មានតូបលក់កាបូប កាតាប ខោអាវ និងគ្រឿងក្រអូបផ្សេងៗ រួមទាំងគ្រឿងកាឡៃ) ឆេះទាំងស្រុង និងម៉ូតូមួយគ្រឿងម៉ាកឌ្រីមសង់ផងដែរ។ ក្នុងករណីនេះដែរ សមត្ថកិច្ចជំនាញ កំពុងតែធ្វើការស្រាវជ្រាវបន្ថែម ៕
អត្ថបទ៖ បងម៉េង