កុងតឺន័រមួយគ្រឿងបត់មិនប្រយ័ត្នកៀររថយន្តព្រូសខ្ទេចអស់មួយចំហៀង
រាជធានីភ្នំពេញ ៖ រថយន្តធុនធំសណ្ដោងកុងតឺន័រមួយគ្រឿង បេីកបត់ស្ដាំខ្វះការប្រុងប្រយ័ត្ន ក៏ជ្រុលទៅកៀររថយន្ត PRIUS មួយគ្រឿងទៀតបណ្ដាលឲ្យរងការខូចខាតយ៉ាងដំណំ តែមិនបណ្ដាលឲ្យមនុស្សរបួសទេ បង្កការភ្ញាក់ផ្អើលឡេីងដល់អ្នកដំណេីរ រាយការណ៍ប្រាប់សមត្ថកិច្ចមូលដ្ឋានចុះទៅពិនិត្យមេីល ព្រោះរថយន្តទាំងពីរគ្រឿងនៅចំកណ្ដាលផ្លូវតែម្ដង។ កាលពីវេលាម៉ោងជិត០១រំលងអាធ្រាត្រ ឈានចូលថ្ងៃអង្គារិ៍ ទី៤ ខែកុម្ភៈ ឆ្នាំ២០២០នេះ នៅត្រង់ចំណុចផ្លូវបំបែកជាបួន (ស្តុបពេទ្យចិន) ស្ថិតលេីកំណាត់ផ្លូវព្រះសីហនុ កែងផ្លូវព្រះមុនីវង្ស ក្នុងសង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ។
សាក្សីដែលឃើញហេតុការណ៍ផ្ទាល់បានរៀបរាប់ឲ្យដឹងថា នៅមុនពេលកើតហេតុ គេឃេីញរថយន្តសណ្ដោងកុងតឺន័រមួយគ្រឿង ម៉ាក SCANIA ក្បាលពណ៍ស ពាក់ស្លាកលេខស្វាយរៀង 3A-4266 និងកន្ទុយពាក់ស្លាកលេខស្វាយរៀង 4A-1988 បេីកបរដោយបុរសមិនស្គាល់អត្តសញ្ញាណម្នាក់ បានធ្វេីដំណេីរតាមបណ្តោយផ្លូវព្រះសីហនុ ក្នុងល្បឿនលឿនល្មម ទិសដៅពីលិចមកកេីត ស្របគ្នាជាមួយរថយន្តមួយគ្រឿងទៀត ម៉ាក TOYOYA PRIUS ពណ៍ស (ដោះស្លាកលេខចេញ) បេីកបរដោយបុរសម្នាក់ និងនារីរូបស្រស់ម្នាក់ទៀតរួមដំណេីរជាមួយ ក្នុងល្បឿនលឿនល្មមដូចគ្នា ខណៈមកដល់ចំណុចស្តុបពេទ្យចិន កែងផ្លូវព្រះមុនីវង្ស រថយន្ត PRIUS ក៏បន្តបេីកទៅមុខត្រង់ ព្រោះភ្លេីងស្តុបចរាចរណ៍ លោតពណ៍ខៀវ ចំណែកឯរថយន្តកុងតឺន័រ បានបត់ស្ដាំដៃកៀររថយន្ត PRIUS បណ្ដាលឲ្យខ្ទេចមួយចំហៀងមុខខាងឆ្វេងធ្លាក់កាង រងការខូចខាតយ៉ាងដំណំ តែមិនបណ្ដាលឲ្យមនុស្សរបួសទេ គ្រាន់តែរថយន្តទាំងពីរគ្រឿង នៅជាប់ពាក់កណ្ដាលស្តុបពេទ្យចិនតែម្ដង បង្កការភ្ញាក់ផ្អើលឡេីងដល់អ្នកដំណេីរ រាយការណ៍ប្រាប់សមត្ថកិច្ចមូលដ្ឋានប៉ុស្តិ៍បឹងកេងកងទី២ ចុះទៅពិនិត្យមេីលផងដែរ។
បច្ចុប្បន្នក្រោយកេីតហេតុ កម្លាំងល្បាតមូលដ្ឋាន បានចុះមកដល់ រួចអោយភាគីទាំងសងខាងដោះស្រាយគ្នាមួយជំហានសិន ហេីយក្រោយមកភាគីទាំងសងខាងបានចរចារគ្នាត្រូវ និងបញ្ចប់រឿងនៅកន្លែងកេីតហេតុមិនរំខានដល់សមត្ថកិច្ចចុះមកវាស់វែងឡេីយ៕
អត្ថបទ៖ ម៉េង