នាយកដ្ឋានប្រឆាំងបទល្មើសបច្ចេកវិទ្យាចាប់ខ្លួនជនជាតិចិនម្នាក់ ទម្លាយឯកសារសម្ងាត់របស់ក្រុមហ៊ុន

យោងតាមការបញ្ជាក់របស់ នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា នៅថ្ងៃទី២៧ ខែធ្នូ ឆ្នាំ២០១៩ នាយកដ្ឋានប្រឆាំងបទល្មើសបច្ចេកវិទ្យា បានទទួលពាក្យបណ្តឹងពីជនរងគ្រោះ ប្ដឹងឈ្មោះ CHEN CHEN ភេទប្រុស ជនជាតិចិន សញ្ជាតិចិន ដែលបានទម្លាយឯកសារការសម្ងាត់របស់ក្រុមហ៊ុន និងប្រើប្រាស់អុីមែលរបស់ក្រុមហ៊ុន ដើម្បីគៃបំបាត់ផលប្រយោជន៍ និងប៉ះពាល់ដល់កេរ្តិ៍ឈ្មោះរបស់ក្រុមហ៊ុន។​

ដោយមានបញ្ជាផ្ទាល់ពី​ ឯកឧត្តម​ ឧត្តម​សេនីយ៍​ឯក​ ជា​ ពៅ​ ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា​ និងមានដីការបញ្ជាឱ្យចូលខ្លួន​ នៃអយ្យការអមសាលាដំបូងរាជធានីភ្នំពេញ​ នៅថ្ងៃទី២៥ ខែកុម្ភៈឆ្នាំ២០២០ មន្ត្រីជំនាញនៃនាយកដ្ឋានប្រឆាំងបទល្មើសបច្ចេកវិទ្យាបានធ្វើការស្រាវជ្រាវ នឹងឈានទៅដល់ការឃាត់ខ្លួនជនសង្ស័យឈ្មោះ CHEN CHEN អាយុ​ ៣២ឆ្នាំ​ ជនជាតិ​ចិន​ នៅចំណុចបុរីថៃឈុនគ្រី ផ្លូវលំ ភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ នាំមកនាយកដ្ឋានប្រឆាំងបទល្មើសបច្ចេកវិទ្យាដើម្បីកសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញដើម្បីចាត់ការតាមផ្លូវច្បាប់៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា