ហួសចិត្ត! លេខ១១៥ ប្រើសម្រាប់បងប្អូនខលចង់សួរចង់ដឹងពីជំងឺ COVID-19 ពីគ្រូពេទ្យជំនាញ បែរជាមានមនុស្សមួយចំនួនខលមកហើយប្រេីសំដីអសុរស គ្រោកគ្រាត និងពាក្យប្រមាថ
ខណៈដែលកម្ពុជា បានរកឃើញនូវករណីCOVID-19 ក្រសួងសុខាភិបាលក៏បានដាក់នូវលេខទូរស័ព្ទទាន់ហេតុការណ៍ ១១៥ សម្រាប់ឲ្យបងប្អូនប្រជាពលរដ្ឋដែលមានចម្ងល់ទាក់ទងនឹងករណីជំងឺ COVID-19។ ប៉ុន្តែ ការទូរស័ព្ទចូលលេខ ១១៥ មកមន្រ្តីទទួលបន្ទុក ១១៥ នេះ មាន៧០ភាគរយ បានការដេីម្បីសួរពត៌មានអំពីជំងឺ COVID-19 ព្រមទាំងរាយការណ៍ស្ថានភាពសុខភាព និង ៣០ភាគរយមិនបានការ។
ដោយមានការទូរស័ព្ទចូលមិនបានការដូចជា ១. ប្រេីកុមារតូចៗឲ្យនិយាយជំនួស, ២. ក្រុមក្មេងដដែលៗទូរស័ព្ទចូលគ្រប់គ្នានៃគ្រូពេទ្យជំនាញ, ៣. ទូរស័ព្ទចូលមិននិយាយបេីកចោល, ៤. ទូរស័ព្ទចូលចាក់ចំរៀងឲ្យស្តាប់, ៥. ប្រេីសំដីអសុរស គ្រោកគ្រាត និងពាក្យប្រមាថ, ៦. អ្នកស្រវឹងទូរស័ព្ទចូលនិយាយស្តាប់មិនយល់ និង ៧. មានក្រុមទូរស័ព្ទតេស្តលេង។
នាយកដ្ឋានប្រយុទ្ធនឹងជំងឺឆ្លង សំណូមពរឲ្យសាធារណៈជនមេត្តាប្រេីប្រាស់លេខ១១៥ នេះសំរាប់បំរេីប្រជាពលរដ្ឋដែលអ្នកចង់សួរចង់ដឹងពីជំងឺ COVID-19 ព្រោះពេលបងប្អូនរំខាននាំឲ្យអ្នកដទៃទៀតមិនអាចទូរស័ព្ទចូលបាន ដែលចង់ជួបគ្រូពេទ្យជំនាញ សូមបងប្អូនប្រេីលេខ ១១៥នេះឲ្យមានតំលៃបំផុត។ ក្នុងនោះក៏មានការសំណូមពរដល់អាជ្ញាធរដែនដីទាំងអស់មេត្តាអប់រំប្រជាពលរដ្ឋមូលដ្ឋាន និងករណីចាំបាច់គួរចាត់វិធានការទៅតាមផ្លូវច្បាប់៕
ប្រភព៖ នាយកដ្ឋានប្រយុទ្ធនឹងជំងឺឆ្លង